Tatarstan Xäbärläre 2/2022
Tatarstanda bulıp uzğan qayber waqıyğalarğa qısqaça küzätü
Qazan xalıqara möselman kinosı festivale tögällände.
Ul 7nçe sentyabr’dän 11enä qadär Tatarstan başqalasında ütte. Festival’neñ gran-priyın İran rejissyerı Naxit Xäsänzadäneñ “Tınıç dan” näfis fil’mı aldı. Töp priznı ciñüçegä Tatarstan mädäniyat ministrı İrada Äyüpova tapşırdı. “Tatar-inform” mäğ’lümat agentlığı citkergänçä, Tatarstan ilbaşınıñ maxsus bülägenä isä Qazaqstannan “Rux” fil’mı layıq dip tabıldı.
Yazuçı Äxät Gaffarnıñ qaberenä taş quyıldı.
Tatar xalqınıñ kürenekle şäxese 2021nçe yılnıñ 1nçe ğıynvarında 72 yäşendä küzlären mäñgelekkä yomdı. Uzğan atnada 9nçı sentyabr’ könne anıñ “Kurgan” ziratında qaberenä taş quyu märasime uzdı. “İntertat” gazetı yazğança, çarağa Äxät Gaffarnıñ tuğannarı, qalämdäşläre häm yaqtaşları cıyıldı. Qara töstäge qaber taşına ädipneñ fälsäfi dürt’yullığı çoqıp yazılğan: “Olı yuldan atlar uza, bezgä qala tuzanı. Alda ğomer bardır barın, sağındıra uzğanı”. Qızı Läylä Gaffarova äytkänçä, Äxät ağa “Olı yulnıñ tuzanı” cırın bik yaratqan. Bu dürt’yullıqnı da şuña iyären yazğan.
Röstäm Miñnexanov Kovid-19 turında kisätte.
Tatarstan ilbaşınıñ räsmi internet säxifäsennän alınğan mäğ’lümatlarğa qarağanda, respublikada uzğan atnada koronavirus belän awıruçılar sanı 1,8 tapqır artqan. Röstäm Miñnexanov Xökümät yortında uzğan utırışta tatarstanlılarnı saqlıq çaraların kürergä çaqırdı. Ul, şulay uq, vakśina qadaw êşçänlegen dä aktivlaştıru kürsätmäse birde. Miñnexanov xalıq belän daimi êlemtädä êşläwçe kollektivlarda bitlek rejimın kertergä kiñäş itte.
Tatar sportçısı Kamilä Väliyevanıñ canatarlarınnan büläk.
Tatar qızı, figuralı şuu ostası Kamilä Väliyevanıñ Qıtaydağı canatarları ber säwdä yortında sportçınıñ videobrazları belän stend urnaştıra. TNV kanalı citkergänçä, bu xaqta törle pabliklarda urtaqlaşular kürergä mömkin. Stendta Olimpiya çempionınıñ iñ yaratqan fotoları häm canatarlarnıñ teläkläre urın ala.
Qazannıñ Qaban küle yarı - iñ yaxşılar isemlegendä
Ul Rusiyädä 21nçe ğasırda tözelgän 20 töp arxitektura qorılmaları isemlegenä kertelgän. “Watanım Tatarstan” gazetı yazğança, reyting avtorları külneñ üzeneñ dä tiñdäşsez tabiğat’ yädkäre buluın bilgeläp uza. Yar buyınıñ berençe êtabı - 2018nçe yılda, ikençese - 2021dä açılğan. Tözekländerü äle haman däwam itä. Proyektçılarnıñ töp burıçı êkosistemanı torğızu bulğan.
İñ yaxşı arxitektura ob’yektları isemlegenä, şulay uq, Mäskäwneñ “Dominion Tower”, “Skolkovo”, GÊS-2, Sankt-Peterburgnıñ “Yaña Gollandiyä” şikerlle qorılmaları da kergän.
