“Wasil, sin yalğışasıñ”

Tatarstan başqalası Qazan uramnarında “Wasil, sin yalğışasıñ”, “Bötendön’ya tatarları kongressınıñ qarar ölgese - xurlıq” digän yazular barlıqqa kilde. Qäğaz’ bitkä basılıp cämäğat’ urınnarında berketelgän älege iğ’lannarda süzneñ soñğı könnärdä uzğan Qorıltaydağı bäxäsle rezolyuśiyä häm Milli Şura räise Wasil Şäyxraziyev turında baruın añlaw qıyın tügel.

Êş şunda ki, Bötendön’ya tatar kongressınıñ 8nçe Qorıltayı rezoluıśiyäsenä Ukrainanı denaśifikaśiyäläw säyäsäten xuplaw turında cömlälär kergän. Bu turıda ädip, cämäğat’ êşleklese Fäwziyä Bäyrämova üzeneñ sośial’ media akkauntında da yazdı. “Min bu xaqta Milli Şura räise Wasil Şäyxraziyev belän şäxsi söyläşep qaradım, mondıy rezolyuśiyäne qabul itärgä yaramawı turında kisättem. Ämma, küräsez, faydası bulmadı,”-di ul.

Fäwziyä xanım rezolyuśiyägä protest yözennän utırışnı taşlap çığıp kitte. Bu turida jurnalist Rimma Bikmöxämmätova bolay dip yaza: “Suğışnuı xuplawçı rezoluıśiyägä qarşı çığarğa berdänber keşe qıyulıq taptı. Meñ keşe arasınnan. Ul da xatın-qız - Fäwziyä Bäyrämova”.

Qorıltaynıñ êşen küzätep baruçılar rezoluıśiyäneñ yäşen tizlegendä qabul itelüen, anıñ säxnädän ayırım uqılmawın assızıqlıy. Küplär, bigräk tä çit illärdän kilgän tatarlar êşneñ nidä buluın añlamıyça da qala.  Fäwziyä Bäyrämova qorıltayda qatnaşqan Törkiyä tatarları belän söyläşkännän soñ bolay dip yazdı: “Alar minem ni öçen protest belderep zaldan çığıp kitkänne añlamağan. “Ul qıçqırıp uqılmadı bit, bez qäğaz’dägesen añlamadıq, çönki kirill älifbası xäreflären belmibez” didelär”.

Nindi qarar qabul itülären abaylamıy qalğan dön’ya tatarları üzläreneñ abruyları töşerelde dip sanıy. Qayber oyışmalar Tatar kongressınnan çığarğa cıyına.

Monreal’ tatarları oyışması citäkçese Marat Säläxetdinov “Azatlıq”qa interv’yusında rezolyuśiyägä Rusiyäneñ Ukrainadağı suğışın xuplawnı kertüne mäğ’näsezlek dip atadı. “Aqsaqallar şurası häm oyışma äğ’zaları belän kiñäşläşergä kiräk. Şunnan soñ Kongresstan çığarbız dip uylıym, başqaça yulıbız yuq,”-di ul. Sälaxätdinov Tatar kongressınıñ bügen xökümät qulındağı oyışma ikänen, böten tatar xalqı isemennän söylärgä xoquqı bulmawın äytä.

Finlyandiyä tatarları başqa millätkä qarşı suğışnı tatar isemennän xuplawnıñ döres adım bulmawın citkerä. “Mondıy qarar qabul itelgän oçraqta, bu Dön’ya tatar kongressı tügel, ä Rusiyä tatar kongressı bulıp çığa. Dön’ya tatarların säyäsi mäs’älälärgä qatnaştırırğa yaramıy,”-dip söyli Finlyandiyäneñ “İslamiyä” cämğıyäte räise Göltän Bädretdin “Azatlıq”qa.

AQŞta yäşäwçe tatar ğalime Yulay Şamiloğlu Kongressnıñ bu adımın meskenlek häm qollıq dip atıy. “Mäskäw uyınında qatnaştırıp tatar oyatqa qaldırıldı,”-di ul “Azatlıq”qa.

Rezolyuśiyädäge tatarlarğa qağılışı bulmağan bäxäsle qararnı bäysez jurnalistlar häm cämäğat’ êşlekleläre dä kisken tänqıyt’ utına tottı. Säyäsätçe Ruslan Aysin üzeneñ sośial’ media akkuntında: “Bu Qorıltay, çınlıqta,  Bötendön’ya tatar kongressınıñ matäm cıyını buldı” dip yazdı. Cämäğat’ êşleklese Lenar Miftaxov isä “Tatarlarnıñ monnan soñ Bötendön’ya kongressı yuq. Bez anı küptän yuğaltqan idek, tik xäzer ul ayırmaçıq kürende” dip belderä.

İsegezgä töşeräbez, Tatarstanda 30nçı iyül’dän 2nçe avgustqa qadär Bötendön’ya tatar kongressınıñ 8nçe Qorıltayı uzdı.

İskärmä: Foto Azatlıq radiosınıñ İnstagram akkauntınnan alındı