Татарстан хәбәрләре/Tatarstan xäbärläre-18

Bötendön’ya tatar kongressınıñ 8nçe qorıltayı

30nçı iyül’dä Tatarstan başqalası Qazanda Bötendön’ya tatar kongressınıñ 8nçe qorıltayı başlandı. Anda 35 ildän 1500 delegat häm şäräfle qunaq qatnaşa. Bıyıl çaranıñ 30 yıllığı. İntertat êlektron gazetı yazğança, yubiley qorıltayın 100dän artıq massaküläm mäğ’lümat çarası yaqtırttı.

Çarada, ğadättägeçä, tatar xalqınıñ mädäniyäten, telen, ğoref-ğadätlären saqlap qaluğa häm üsterügä zur öleş kertüçe ictimağıy oyışmalar, fän, mäğarif, sport häm sänğat’, däwlät idaräläre, zur şirkät citäkçeläre häm meśenatlar qatnaşa.

30nçı iyül’dä qorıltay delegatları häm qunaqlar İske Tatar bistäsendä uza torğan “Peçän bazarı” festivalendä qatnaştı. 31nçe iyül’dä alar İzge Bolğar şähärenä säfär qıldı. 1nçe avgustta “Qazan êkspo”  kürgäzmälär üzägendä Bötendön’ya tatar kongressınıñ Milli Şurası utırışı uzdı. Anda, şulay uq, berniçä fiker alışu mäydançığı êşläde. 2nçe avgustta Tatarstan ilbaşı Röstäm Miñnexanov qatnaşında 8nçe qorıltaynıñ plenar utırışı häm yaña saylanğan Milli Şuranıñ berençe cıyılışı uza.

Tatarstanda uraq öste başlandı

Tatarstannıñ qayber rayonnarında aşlıq suğu êşenä kereştelär. Tatar-inform mäğ’lümat agentlığı yazğança, Tatarstan ilbaşı Röstäm Miñnexanov qırlarda tir tügüçelärgä qızıqsındıru tüläwläre birü turında uylarğa çaqırdı. “Keşelär aqça êşlärgä tiyeş. Bez monıñ xisabına kübräk uñış alaçaqbız. Kombaynçı xezmäte bik awır. Mexanizatorlarnıñ ike smenalı êşen oyıştırığa, alarnı waqıtında qaynar aş belän täêmin itärgä kiräk,”-dip söyläde ul.

İlbaşı citkergänçä, bıyıl cömhüriyättä barlığı 1,5 million gektar mäydanda börtekle häm quzaqlılar, 427 meñ gektar mäydanda may kul’turaların cıyıp alu kiräk. Basularda barlığı 3 meñ 417 meñ kombayn êşläyäçäk.

Qazan gimnaziyäsendä atış oyıştıruçınıñ saq astı waqıtı ozaytıldı

Tatarstannıñ yuğarı mäxkämäse Tatarstan başqalası Qazandağı 175nçe gimnaziyädä atış oyıştırğan İlnaz Ğalyawiyevnıñ izolyaśiyä waqıtın ozınayttı. Monıñ öçen ber’yulı 2 tikşerüçe üteneç belän möräcäğat’ itkän bulğan.   

Tatar-inform yazğança, utırış başında tikşerü mäxkämädän prośessnı yabıq rejimda uzdırunı, zaldan çit keşelärne, şul isäptän, massaküläm mäğ’lümat çaraları wäkillären dä çığarıp cibärüne sorıy.  Bu üteneçne zıyan kürüçe yaq -  hälaq bulğan uquçılarnıñ  äti-äniläre dä xuplıy. Ğayeplänüçe qarşı kilmi. “Miña barıber,”- dip cawap birä ul mäxkämägä.

Açıqlanğança, ğayeplänüçe cinayät’ êşeneñ tomnarı belän tanışırğa ölgermägän. Xäzerge waqıtta ul alarnıñ yartısın - 300 tomnıñ 148en genä öyrängän. Şul säbäple tikşerü ğayeplänüçene tağın 3 ay saq astında qaldırunı sorıy. Mäxkämä qararnı tiz qabul ita - ğayeplänüçeneñ izolyaśiyä waqıtı 11nçe noyabr’gä qadär ozaytıla.

İskärtep uzıyq, faciğa uzğan yılnıñ mayında buldı. İlnaz Ğalyawiyev mäktäpkä kerep 2 uqıtuçı häm 7 uquçınıñ canın qıydı.  

Fontanda balanıñ barmaqları özelde

Qazannıñ Gor’kiy isemendäge parkında cırlıy torğan fontannarda 6 yäş’lek malaynıñ ayağındağı 3 barmağı özelä. Massaküläm mäğ’lümat çaralarındağı xäbärlärgä qarağanda, 3 balalı ğailä Krasnotur’inskidan kilgän. Parkkqa kergäç balalar fontan östendä quışıp yögereşä başlıy. Şunda iñ ölkäne qıçqırıp yığıla. Anıñ ayağında 3 barmağı kiselgän bula. İke barmaqnı xirurglar kire tegep quya.

Zıyan kürgän balanıñ äti-änise fontanğa xezmät kürsätä torğan oyışma belän êlemtägä kergän. Alar qazanıñ säbäben betergängä qadär fontannı yabıp torunı kire qaqqan - yänäse qağıydälärne ütärgä kiräk bulğan. Monıñ urınına oyışma ğailägä yärdäm yözennän 30 meñ sum birä.

Älege waqıyğa nisbätennän “Qurqınıçsızlıq taläplärenä cawap birmäwçe xezmät kürsätü” maddäse buyınça tikşerü êşe quzğatılğan.       

Qazanda “Çayka”lar cıyıldı

Qazanda Kreml’ yanında “Çayka-GAZ” Bötenrusiyä xökümät avtomobil’läre cıylışı qısalarında Retro-maşinalar kürgäzmäse uzdı. “Watanım Tatarstan” gazetı yazğança, Musa Cälil häykäle yanına “Çayka” avtomobil’läreneñ 10nan artıq töre tezelgän bula.

“İldä inde berniçä yıl “Çayka” avtomobil’läre xucaları klubı êşli, häm bıyıl bez berençe tapqır regional’ cıyılış uzdırabız. Moña qadär oxşaş çaralar Mäskäwdä genä ütte,”-dip söyli “Avtoretroklub-21”neñ citäkçese Roman Pinayev.