Tatarstan xäbärläre 10/2024

Tatarstan räise Törkiyädä

1nçe martta Tatarstan räise Röstäm Miñnexanov Antaliya diplomatiya forumında qatnaştı. Ul çara qısalarında Törkiyä ilbaşı Räcäp Tayyip Ärdoğan, Vengriya prem’yer-ministrı Viktor Orban, Törekmänstannıñ xalıq mäsläxäte räise Gorbangulı Bärdemöxämmädov häm başqa räsmi zatlar belän oçraştı. Älege söyläşülärdä törle mäs’älälär, şul isäptän, regional’ xezmättäşlek turında fiker alıştılar. Tatarstan räise Röstäm Miñnexanov citäkçelegendäge “Rusiyä-İslam dön’yası” strategik küzallaw törkeme qısalarında xezmättäşlek tä telgä alındı.

“Kiläçäk uyınnarı” yabıldı

Tatarstan başqalası Qazanda oyıştırılğan “Kiläçäk uyınnarı” turnirınıñ yabılu tantanası 3nçe martta uzdı. Bu fizik häm śifrlı ülçämdäge yarışlarnı berläşterä torğan yaña formattağı sport tamaşası. Berençe uyınnarda 270 komanda häm 21 innovaśion disśiplinada 107 ildän 2 meñnän artıq sportçı qatnaştı. Yarışlar 5 kategoriyägä bülende: sport, taktika, strategiyä, texnologiyälär, tizlek. Çara 19nçı fevral’dä start aldı, Räsmi açılış 21nçe fevral’dä buldı. Anda Rusiyä däwlät başlığı Vladimir Putin, Tatarstan räise Röstäm Miñnexanov häm çit il liderları qatnaştı.

“Yıl xatın-qızı. Xatın-qız qaraşınnan yıl ir-atı” konkursına yomğaq yasaldı

3nçe martta Qazannıñ Musa Cälil isemendäge Tatar däwlät akademiyä opera häm balet teatrında “Yıl xatın-qızı. Xatın-qız qaraşınnan yıl ir-atı” bäygesenä yomğaq yasaldı. Büläklärne ciñüçelärgä Däwlät sovetı räise urınbasarı Marat Äxmätov tapşırdı. Konkurs 10 nominaśiyädä uza. Aralarında cämğıyät’tä tanılu alğan analar, sänğat’tä kürenekle näticälärgä ireşkän güzäl zatlar, ğalimälär, hönärçe hanımnar, lider xatın-qızlar, êşquarlar, aq yawlıqlı äbilär bar. Ä yıl ir-atların zur uñışlarğa ireşep näticäle êşçänlek kürsätkän zatlar häm igelege belän tanılğannar arasınnan sayladılar.  

Tinçurin teatrında yanğın

Uzğan yäkşämbe könne kiçke säğat’ 7lär tiräsendä Qazannıñ Kärim Tinçurin isemendäge Tatar däwlät drama häm komediya teatrında yanğın çığa. Binadan 30lap keşene êvakuaśiyälärgä ölgerälär. Berkem dä zıyan kürmägän.  Berençel mäğ’lümatlarğa qarağanda, teatrdağı êlektr qalqanı yanğan.  

Tatarstan iftarı federal’ status ala

Bıyıl Tatarstanda uzaçaq respublika iftarı “Rusiyä-islam dön’yası” strategik qaraş törkeme qanatı astında oyıştırıla, şuña kürä federal’ status ala. Ul 29nçı martta bula häm Ramazan ayınıñ ikençe dekadasın tögälli. Tatarstan möselmannarı Diniyä näzarätennän belderülärençä, iftarda yuğarı däräcäle çit il qunaqlarınıñ da qatnaşuı kötelä. Programmada dön’yaküläm bilgele qor’änxafizlär häm näşid başqaruçılarnıñ çığışları qaralğan. Pespublika iftarına 12 meñ keşe çaqıru küzallana.

Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı. Tatarstan räiseneñ räsmi portalı häm başqa räsmi çığanaqlardan faydalanıldı.