Tatarstan xäbärläre 8/2024
Tatarstan häm tatar dönyasındağı qayber waqıyğalarğa qısqaça küzätü
Qırğızstan ilbaşı Putin häm Miñnexanov belän oçraşa
Qırğızstan ilbaşı Sadır Caparov Qazanğa “Kiläçäk uyınnarı” açılışına kilä.
Rusiyägä ike könlek säfäre waqıtında ul Rusiya däwlät başlığı Vladimir Putin häm Tatarstan Räise Röstäm Miñnexanov belän oçraşırğa planlaştıra. Sadır Caparov Qazan şähärendä “Kiläçäk uyınnarı” xalıqara mul’tisport turnirın açu tantanasında qatnaşaçaq. Oçraşuda säwdä, investiśiyälär häm mädäni- gumanitar ölkädä ike yaqlı xezmättäşlekneñ aktual’ mäs’äläläre turında söyläşü kötelä.
“Qazanğa böten dön’ya diyärlek qunaqqa kilä”
19 nçı fevral’dän 3 nçe mart aralığında Qazanda xalıqara “Kiläçäk uyınnarı” ütä.
Tatarstan Respublikası sport ministrı Vladimir Leonov beldergänçä, turnirda 107 il wäkile qatnaşa.
“Uyınnarda 2 meñnän artıq keşe qatnaşa. Bazada 107 il wäkilläre häm 277 komanda bar. Bezgä böten dön’ya diyärlek qunaqqa kilä. Töp programmada -16 disśiplina, kiñäytelgänendä 5 disśipilina bula”, - dip söyli ministr.
Sport ministrı Tatarstan häm Qazannıñ zur yarışlar ütkärüdä täcribäse bulsa da, “Kiläçäk uyınnarı”nıñ respublika öçen revolyuśion yaña proyekt buluın äytä.
“Kiläçäk uyınnarı”nıñ açılış tantanası “Qazan Êkspo” kürgäzmälär üzägendä 21 nçe fevral’dä, yabılu tantanaı 3 nçe martta bulaçaq.
Tatarstan wäkillege İzmirdä buldı
Tatarstan wäkillege İzmirdä êşmäkärlär belän oçraşu ütkärde.
İzmir säwdä palatası beldergänçä, Tatarstan Cömhüriyäte säwdä-sänäğat’ palatası äğ’zası bulğan 13 firma qatnaşında êşlekle oçraşular uzdı.
İzmir säwdä palatası idarä şurası başığı Mäxmüt Özgänär Törkiyä belän Tatarstan arasındağı säwdä külämeneñ artuın, ike yaqnıñ da bu mönäsäbätlärne üsterü häm nığıtuda qatğıy buluın äytte.
”Bezneñ xezmättäşlek säwdä belän genä çiklänmi. Küp ölkälärgä, ayıruça ênergiya, transport, tözeleş häm avtomobil’lärgä investiśiyälär sanı artu belän xezmättäşlek könnän kön tiränäyä bara”,- dide Özgänär.
Cıyılışta 200 gä yaqın Törkiyä şirkäte törle tarmaqlardan 13 Tatarstan firması belän söyläşülär dä ütkärde.
Qazanda xalıqara “Cälil uquları” ädäbi bäygese ciñüçelären büläklädelär
Uzğan atnada (15 nçe fevral’dä) Qazannıñ “Säydäş” mädäniyät üzägendä geroy-şağıyr’ Musa Cälilneñ 118 yıllığına bağışlanğan konśert uzdı. Bäyrämdä 6nçı Xalıqara “Cälil uquları” ädäbi bäygesenä näticälär yasaldı, ciñüçelär büläklände.
Bıyıl bäygegä Rusiyäneñ 26 töbägennän, Tatarstannıñ här rayonınnan häm çit illärdän (Azärbaycan, Bolgariya, Qazaqstan, Üzbäkstan, Törkiyä) 40 meñnän artıq ğariza qabul itelgän. Oyıştıruçılar äytüençä, ikençe êtap näticäläre buyınça finalğa 777 qatnaşuçı uzğan. Jyuri qararı nigezendä barlığı 102 ciñüçe bilgelängän. Şiğır’lär 23 teldä yañğırağan.
“Cälil uquları” ädäbi bäygesendä berençe urınğa layıq buluçılar arasında Törkiyädä yäşäwçe millättäşebez Fänis Zıyalı da bar.
Novosibirsk şähärendä tatar aş-suları bäygese uzaçaq
25 fevral’dä Novosibirsk şähärendä “Tuq tamaq” tatar aş-suları ölkä bäyräm-bäygese uzaçaq. Novosibirsk ölkäse tatar mädäni üzäge xäbär itkänçä, ul tanılğan aş-su ostası Yunıs Äxmätcanovka bağışlana.
Oyıştıruçılar äytüençä, programmada tatar xalıq aşları, bäyräm konśertı häm Yunıs Äxmätcanovnıñ tormış yulı turında viktorina bar.
Qazanda qar bik küp yawa
Fevral’neñ 18 könendä Qazanda qar aylıq normanıñ 110%ı külämendä yawğan. Qar yawu näticälären beterüdä 700 êşçe häm 500 berämlek texnika cälep itelgän. Uzğan atnada ğına da şähär uramnarınnan 37 meñ tonnadan artıq qar çığarılğan. Ğıynwar ayında Qazan şähärendä qar yawu norması 66%qa “arttırıp ütälgän”.
Tatarstanda “Tatar azanı” bäygese iğ’lan itelde
Tatarstanda Ramazan aldınnan tatar mäkame belän azan äytü bäygesenä start birelde. Çirattağı bäygedä 5 yäş’tän ölkänräk häm baliğ’lıqqa ireşmägän malaylar qatnaşa ala.
Bäyge şartları buyınça azan mili köy qalıplarına nigezlängän tatar mäkame belän äytelergä tiyeş. Täcvid qağıydälären häm içek ozınlığı qağıydälären bozmaw, ğaräp tele awazların döres äytü – töp şart bulıp tora. Azan yañğırawıqlı, küñeldä yaqtı xislär uyata torğan bulırğa tiyeş.
“Tatar azanı” bäygesenä ğarizalar 10 nçı martqa qadär qabul itelä.
Bäygedä ciñüçelär 10 nçı aprel’ - Uraza ğayete könne bilgele bulaçaq. Bu könne uzaçaq Ğayet bäyrämenä bäygedä qatnaşuçılar häm finalğa çığuçılar çaqırılaçaq.
Tapşıruda Tatarstan Räiseneñ matbuğat xezmäte, “Tatar-inform” xäbär agentlığı yazmaları qullanıldı.
