Tatarstan xäbärläre 6/2024

Alsu Qormaşeva tağın ike ay saq astında qala

Tatarstan başqalası Qazannıñ Sovet rayonı mäxkämäse “Azatlıq radiosı”nıñ tatar-başqort xezmäte redaktorı Alsu Qormaşevanı saq astında totu waqıtın ozayttı. Ul tağın 2 ayın tikşerü izolyatorında uzdıraçaq. İsegezgä töşeräbez, Qormaşevanı Rusiyä qanunında çit il agentları turında qaralğan wazıyfalarnı ütäwdän baş tartuda häm Rusiyäneñ xärbi êşçänlege turında mäğ’lümat cıyuda ğayepläp 18nçe oktyabr’dä totqarladılar. Jurnalistqa, şulay uq, Ukrainadağı suğışnı naçar yaqtan kürsätkän kitapnı bastıruda qatnaşuı öçen dä ğayepläw belderelergä mömkin. Bilgele bulğança, “Azatlıq radiosı” Rusiyädä çit agent statusındağı massaküläm mäğ’lümati çaraları reestrına kertelgän.

Tatarstan awıl ipotekasında aldınğı

Uzğan yıl awıl ipotekası programmasına “Rossel’xozbank”nıñ Tatarstan töbäk filialı 4 milliard sum bülep birgän. Näticädä meñnän artıq ğailä awıl cirlegendä toraq satıp alu mömkinlegenä iyä bula. Bu xaqta Tatarstannıñ Däwlät terkäwe, kadastr häm kartografiya xezmäte xäbär itä.

“Yıl yomğaqları awıl ipotekasınıñ tatarstanlılar arasında kiräkle programma buluın tağın ber qat rasladı. 4 yıl êçendä Tatarstanda 4200dän artıq ğailä 11 milliard sum külämendä yärdäm aldı”- dip citkerä “Rossel’xozbank”nıñ töbäk filialı citäkçese Lälä Qudärmätova. Programmanı ğamälgä aşıruda respublika ildäge töbäklär arasında lider.

“Tatar teleneñ anlatmalı süzlege” avtorlarına - büläk

“Tatar teleneñ anlatmalı süzlege” avtorları Däwlät premiyäsenä layıq buldı. Altı tomlı süzlek 2015nçe yılda basıla başlıy. Anıñ yıl sayın ber tomı çığa kilä häm tirajı taratıla bara. Altınçı tom isä 2021nçe yılda basıla.

“Tatar teleneñ anlatmalı süzlege” öçen fän häm texnika ölkäsendä Tatarstan premiyäsenä filologiyä fännäre doktorı, fännär akademiyäseneñ viśe-prezidentı Aynur Timerxanov, filologiyä fännäre kandidatları Färidä Tahirova, İlhamiya Sabitova, Ol’ga Ğalimova, Êl’vira Safina, Rinat Säfärov, Firaya Ğaffarova, Gölzadä Sabirova layıq buldı.   

Ğaliäsgar Qamal muzeyı

Qazannıñ Qamal teatrınıñ yaña binasında Ğaliäsgar Kamal muzeyı buldıru uyı bar. Bu täq’dimne älege şäxeskä bağışlanğan tügäräk östäl cıyınında Tatarstan Fännär akademiyäseneñ viśe-prezidentı Daniyä Zahidullina yasadı. Ul Ğaliäsgar Qamalnıñ xalıqqa xezmät kürsätep, tatar millätenä teatr, dramaturgiyä büläk itep häm ğayät’ bay miras qaldırıp kitüen assızıqlıy. 

“Bez xäzer zur ömet belän Qamal teatrınıñ yaña binası açılışın kötäbez. Ul zur mömkinleklär belän êşlänüçe bina. Anda Ğaliäsgar Qamalğa bağışlanğan muzey, klub kebek urın bulıp, älege şäxesneñ tormış tarixı, näsele, fotoları, räsemnäre, illyustraśiyäläre urın alsa ide…”- dip söyli Daniyä Zahidullina üzeneñ çığışında. 

Tatarstanda bäxetlelär yäşi

Tatarstan üzlären bäxetle dip sanawçılar sanı buyınça Rusiyädä öçençe urında. Soraştıru näticälärenä qarağanda, respublikada yäşäwçelärneñ 11%ı üzlären 5 ballğa bäxetle xis itä. Bu xaqta “Tatar-inform” mäğ’lümat agentlığı “Senatinform” xäbärenä tayanıp yaza.

Bäxetlelär sanı buyınça berençelek Yekaterinburgta häm Sverdlovsk töbägendä - anda xalıqnıñ 22 prośentı bäxetle buluın 5 ballğa bäyäli. Tübän Novgorod ikençe urında, anda älege kürsätkeç 16%.

Tatarstanda üzlären 4 ball däräcäsendä bäxetle dip uylawçılar isä - 44%. Belgeçlär fikerençä, tatarstanlılar töbäktä alıp barıluçı säyäsät arqasında üzlären bäxetle xis itä. Respublikanıñ Rusiyädä aldınğı poziśiyälär biläwen, ä ilküläm proyektlarnıñ maqsatlarına ireşü däräcäse buyınça reyringta Mäskäwdän genä qalışuın assızıqlıylar.

Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı. Tatarstan räiseneñ räsmi portalı häm başqa räsmi çığanaqlardan faydalanıldı.