Tatarstan xäbärläre 01/2024

Tatarstan Räise Röstäm Miñnexanov yaqınlaşıp kilüçe Yaña yıl belän qotladı.

Tatarstan Respublikası Räise Röstäm Miňnexanovnıñ Yaña yıl bäyräme uñayınnan möräcäğate çıqtı. Ul respublika xalqın yaqınlaşıp kilüçe 2024 yıl belän qotladı.

“Xörmätle tatarstanlılar!

Bez Tatarstan Respublikasında yäşäwçe xalıqlarnıñ mädäniyäten, telen saqlawğa häm üsterügä, ruxiyät nigezlären, äxlaq qağıydälären nığıtuğa zur iğtibar biräbez. Törle millät häm din wäkilläre ber-bersenä tirän xörmät belän dus-tatu yäşi, ä respublikabız cämğıyät’neñ, grajdannarnıñ berdämlege yuğarı bulu belän ayırılıp tora,” – diyelä qotlawda.

Tanılğan tatar ğalime wafat…

Filologiya fännäre doktorı, Tatarstan Respublikası Däwlät gerbınıñ ideya avtorı Nazıym Xanzafarov wafat. Ğalimgä 86 yäş’ ide.

“Nazıym Xanzafarov Olı Qaybıçta cirlänäçäk. Ozatu 2 ğıynwarda 11 sägät’tä Seber traktı 31 Amerika Quşma Ştatları adresı buyınça bula,” – diyelgän ulı İlşat Xanzafarovnıñ xäbärendä.

“Ozaq yıllar bezneñ institutta êşläde. Sälamätlegenä bäyle 20 yıllar êlek pensiyağa kitkän ide. İnstitutıbız anıñ belän êlemtädä tordı. Ütkän yıl 85 yıllığı uñayınnan kitabın da çığardıq,” – dide Ğalimcan İbrahimov isemendäge Tel, ädäbiyat häm sänğat’ institutı direktorı, filologiya fännäre doktorı Kim Miñnullin.

Doñeśk möselmannarı Diniyä näzaräte binasın tantanalı räweştä açtılar

Doneśk Xalıq Respublikası möselmannarı Diniyä näzaräteneñ rezidenśiyasen açu tantanası buldı. 200 kvadrat metr mäydanlı bina 2 ay däwamında remontlandı. Rusiyä möselmannarı Diniyä näzaräte bu êşkä finans yärdäm kürsätte. Bu xaqta Rusiyä Möftilär şurası matbuğat xezmäte xäbär itä.

Tantanalı çarada Rusiyä möselmannarı Diniyä näzaräte räiseneñ Kön’yaq federal’ okrugtağı Tulı wäqalätle wäkile, Rostov ölkäse möselmannarı Diniyä näzaräte räise imam-möxtäsibe Nail Koläxmätov, Doñeśk, Mariupol’, Makeyevka, Gorlovka, Snejnıy, Torez, Şaxtyersk dini oyışmaları imamnarı häm räisläre qatnaştı.

Törkiyädä Tatar şiğriyäte antologiyase basılıp çıqtı

Tatarstan Yazuçılar berlege matbuğat xezmäte xäbär itüençä, cıyıntıqqa 12 tatar şağıyre – Därdemänd, Säğıyt’ Rämiyev, Ğabdulla Tuqay, Xäsän Tufan, Hadi Taqtaş, Musa Cälil, Sacidä Söläymanova, İldar Yuzeyev, Renat Xaris, Rawil Fäyzullin, Mödärris Äğläm, Zölfät äsärläre kergän.

Antologiyaneñ cawaplı möxärrire – tanılğan ğalim-tyurkolog, filologiya fännäre doktorı, Ägäy universitetı ğalime Mostafa Önär.

2023 yılda näzarätneñ onlayn-mädräsälärendä 26722 möselman uqığan

2023 yılda İdel buyı Bolğarında İslam dinen qabul itügä 110 yıl tulu uñayınnan Tatarstan Respublikasında iğlan itelgän Milli mädäniyätlär häm ğoref ğadätlär yılı qısalarında Tatarstan möselmannarı Diniyä näzaräte häm “Xozur” näşriyat yortı yaña proyekt – rus telendä onlayn-mädräsäne êşlätep cibärde. Şul räweşle, xäzer cir şarınıñ törle poçmaqlarında yäşäwçe rus telle möselmannar İslam nigezläre buyınça buşlay belem ala. Ber yıl êçendä älege resursta, belem alu maqsatı belän, 16230 “şäkert” terkälgän, dip xäbär itä Tatarstan Diniyä näzaräte.

Proyektka ixtıyacnıñ zur buluın anıñ geografiyase raslıy: Rusiyä möselmannarınnan tış, portalda Qazaqstan, Germaniya, AQŞ häm Franśiyadä yäşäwçe millättäşlärebez dä belem ala. Ä Rusiyä töbäklärennän Tatarstan, Mäskäw häm Mäskäw ölkäse, Başqortstan, Tübän Novgoros häm Samara ölkälären atarğa bula.

“Tatar qızı Mordoviya – 2023” bäygeseneñ ciñüçese bilgele

26 dekabr’dä Saranskinıñ Respublika Mädäniyät sarayında “Tatar qızı Mordoviya – 2023” respublika bäygeseneñ finalı buldı. Bu xaqta Bötendön’ya tatar kongressınıñ matbuğat xezmäte xäbär itä.

Saylap alu turın, kulinar häm intellektual’ êtaplar, şulay uq qul êşläre bäygesen uzğannan soñ 7 qız finalğa çıqtı.

Finalda konkursantlar tuğan teldä üzläre belän tanıştırdı, icadi nomerlar täqdim itte. Härqaysı üzeneñ köçle yağın kürsätergä tırıştı.

Mordoviya däwlät pedagogika universitetınıñ filologiya fakul’tetı studentı, 19 yäş’lek Güzäl Kutuyeva bäygeneñ ciñüçese dip tabıldı. Aña 50 000 sunlıq sertifikat tapşırdılar.