Tatarstan xäbärläre 69/2023

Çit il investorları Tatarstan belän qızıqsınuın däwam itä

Qatlawlı iq’tisadi xäl çit il kompaniyälärenä kirtä tügel – alar Tatarstanğa investiśiya kertü mömkinlege belän qızıqsınuın däwam itä. Bu xaqta Tatarstan Räise Röstäm Miñnexanov belderde.

“Bu yılda çit il investiśiyäläre 17 ildän kerde. Alarnıñ kübese êşkärtü proizvodstvoların üsterügä yünälderelgän. İñ küp investiśiya Törkiyädän (14 million dollar), Qıtaydan 13,5 million dollar) häm Qazaqstannan (7,8 million dollar) kerde”,- dip söyläde respublika citäkçese.

Röstäm Miñnexanov Könçığış illäre tarix häm mädäniyät yağınnan respublikağa yaqınraq bulsa da, Tatarstannıñ härwaqıt küpqırlı iq’tisadi kooperaśiyäse buluın assızıqladı.

“Soñğı 15 yılda bezneñ iñ zur investor – Törkiyä. Bu ildän investiśiyälärneñ ğomumi küläme 2 milliard 300 million dollardan artıq täşkil itte. Tatarstan belän êşçänlekkä başqa İslam illäre, bigräk tä tatarlarğa tuğandaş xalıqlar: Tacikstan, Üzbäkstan, Qazaqstan, Qırğızstan, Törekmänstan kompaniyäläre zur qızıqsınu kürsätä. Bıyıl Qazanda Qırğzstannıñ general konsullığı açıldı. Şulay uq respublikada Törkiyä, İran, Qazaqstan, Üzbäkstan häm Törekmänstannıñ general’ konsullıqları êşli”,- dip bilgeläp ütte Tatarstan Räise.

Törkiyäneñ Qazandağı yaña general’ konsulı Tatarstan belän xezmättäşlek plannarın açtı

Törkiyäneñ Qazandağı general’ konsulı Uğur Yılmaz Tatarstan jurnalistları belän oçraşu ütkärde. Jurnalistlar belän oçraşu barışında Tatarstan belän törle ölkälärdä xezmättäşlek mäs’aläläre turında fiker alıştılar. Ayırım alğanda, general’ konsul Törkiyä belän Tatarstan arasında tovar äyläneşe ike tapqırğa artuın äytte.

Şulay uq turistlar almaşu, mädäniyät häm media ölkäsendä yaqlarnıñ üzara êşçänlege mäs’äläläre tikşerelde. Monnan tış Uğur Yılmaz iq’tisad ölkäsendä planlaştırılğan häm inde ğamälgä aşırılğan proyektlar turında söyläde.

Tatarstan Diniyä näzaräte 2024 nçe yılnı “Ğailä häm xäläl yäşäw räweşe yılı” dip iğ’lan itte

2024 nçe yılnı Tatarstan möselmannarı Diniyä näzaräte ğailä häm xäläl yäşäw räweşe yılı dip iğ’lan itärgä qarar itte. “Rusiyädä Ğailä yılı iğ’lan itelde, ä bezneñ qazıylarıbız ğailä qıymmätlären saqlaw buyınça zur êş başqara. Bu êşne köçäytergä häm aña barlıq möxtäciblärne häm imamnarnı cälep itärgä kiräk. Şul uq waqıtta möftiyät öçen xäläl yäşäw räweşen taratu mäs’äläse dä bik möhim bulıp qala. Beznen respublika möselmannar öçen uñayılı töbäk bulırğa tiyeş”,- dip söyläde Tarastan möftiye Kamil xäzrät Sämiğullin.

Alinä Zahitova “Yıl tatarları” xalıq tawış birüendä ciñüçe buldı

Olimpiya çempionı Alinä Zahitova “Yıl tatarları” reytingınıñ “Xalıq saylawı” nominaśiyäsendä ciñüçe buldı.

4 kön däwam itkän qızu köräştä ike favorit bilgelände. Alar – figuralı şuu ostası Alinä Zahitova häm muzıkant, bloger Rail Arslanov.

Näticädä Alinä Zahitova 28 meñ 472 tawış cıyğan, ä Rail Arslanovnı 27 meñ 948 keşe saylağan.

BRİKS uyınnarında 3 meñgä yaqın sportçı qatnaşaçaq

BRİKS uyınnarında Qazanda 5 meñgä yaqın keşe – 3 meñ sportçı häm 2 meñ räsmi zat qatnaşaçaq. Tağın 500 gä yaqın çaqırılğan qunaq kötelä. Uyınnarğa çaqıru xatları BRİKSnıñ 5 äğ’za-däwläte, şulay uq 6 ilgä (Argentina, Misır, Êfiopiya, İran, Soğud Ğaräbstanı, Berläşkän Ğaräp Ämirleklärenä) cibärelgän. Qatnaşuçılar 17 sport ob’yektında 27 sport törendä ciñü öçen köräşäçäk. Alar arasında badminton, boks, yözü, ciñel atletika, suğa sikerü, fextovaniye, näfis gimnastika, şaxmat häm başqalar bar. BRİKS uyınnarı Tatarstan başqalasında kiläse yılnıñ iyünendä uzaçaq.

Qazanda İskändär Biktahirovnı soñğı yulğa ozattılar

Tatar cämäğät’çelege zur yuğaltu kiçerde. 24nçe dekabr’ könne 72 yäşendä ozaq awırudan soň Tatarstannıñ xalıq artistı İskändär Biktahirov wafat buldı.

Tatar êstradasın üsterügä zur öleş kerkän cırçı 1975-1981 yıllarda Tatar däwlät cır häm biyü ansamble xorı artistı, 1981-1995nçe yıllarda Ğabdulla Tuqay isemendäge Tatar däwlät filarmoniyäse êstrada bülegeneň solist-vokalistı, 1995-2009nçı yıllarda Qazan şähär filarmoniyäse başqaruçısı bula. İskändär Biktahirov soñğı yıllarda säxnä veterannarınıñ “İlhamiyat” klubı çaralarında da yış qatnaşa.

Tatar xalqınıñ onıtılmas ulı Biktahirov İskändär İsmäğil ulı belän xuşlaşu märasime 25nçe dekabr’dä Qazannıñ Märcani mäçete yanında uzdı. Cırçını Kurgan ziratında cirlädelär. 

Yazmada Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.