Tatarstan xäbärläre 63/2023

Tatarstan räise Röstäm Miñnexanov Ğazzägä yärdäm cıyğan respublika xalqına räxmät belderde.

Tatarstan räise Röstäm Miñnexanov Ğazzädä yäşäwçelärgä yärdäm ciyuda qatnaşqan respublika keşelärenä räxmät äytte. “Tatarstanlılarğa yärdämçel buluları öçen räxmät! Yärdäm cıyunıñ berençe könennän ük keşelär ğailäläre belän berençe kiräk-yaraq, azıq-tölek alıp kilde”- dide ul Telegram kanalındağı säxifäsendä.

Tatarstanda Ğazzädägelär öçen gumanitar yärdämne 3nçe noyabr’dä cıya başladılar. Berniçä köndä respublika xalqı 30 million sumnan artıq aqça kitergän. Moña Tatarstan möselmannarı Diniyä näzaräteneñ “Zäkyat” fondı 20 tonna azıq-tölek satıp alğan. Tatarstanlılar üzläre dä cıyu noqtalarına 500 kilo azıq-tölek häm yärdäm kiräk-yaraqları kiterä.

Gumanitar yärdäm cıyuda Diniyä näzaräte, “Yärdäm yänäşä!” respublika xäräkäte häm “Zäkyat” xäyriyä fondı aktiv qatnaşa. Cıyılğan yärdäm turi reys belän Misırğa cibäreläçäk, anda alarnı “Qızılay” cämğıyätenä tapşıralar.  

Änkarada Törki dönya yazuçıları qorıltayı buldı

6nçı oktyabr’dän 8enä qadär Törkiyä başqalası Änkarada Törki dönya yazuçıları qorıltayı uzdı. Çara cömhüriyätneñ 100 yıllığına bağışlandı häm anda 19 ildän 100 ädip çaqırulı ide.  Qorıltayda Tatarstan yazuçılar berlege räise Rkail Zäydulla da qatnaştı. Cıyılışta 5 törkemgä bülenep êşçänlek alıp bardılar. Ber törkemdä belem birü, mädäniyat, sänğat’ häm ädäbiyatta berdämlek fikere xaqında söyläştelär. Ğadi uquçılarnıñ iğ’tibarın cälep itä torğan temalarnıñ berse isä – törki dön’yada urtaq kitapxanä, uqu mädäniyatı, berdäm teldä basmalar häm tärcemä problemaları ide. Bik küp bäxäslär uyatqan mäs’älä – törki dön’yada urtaq tel häm berdäm älifba. Yazuçılar, şağıyr’lär häm akademiklar monıñ öçen nilär başqarırğa kiräklege xaqında söyläşä. Tik Rkail Zäydulla fikerençä, bu tiz genä tormışqa aşarday êş tügel. Çönki törki xalıqlarnıñ barısınıñ da däwläte yuq, häm bu mäs’äläne üz başlarına xäl itä almıylar.

Pkail Zäydulla Änkarada tatarlar belän oçraştı

Törki dön’ya yazuçıları qorıltayına kilgän tatar ädibe Pkail Zäydulla 7nçe noyabr’ kiçendä biredä yäşäwçe tatarlar belän dä oçraştı. Tatarstan yazuçıları berlege räise belän küreşü öçen kübräk yäş’lär - Änkarada uquçı tatar studentları häm fänni êş belän şöğal’länüçelär kilgän ide. Oçraşuda Rkail Zäydulla üzeneñ şiğır’lären söyläde. Alarnıñ qayberläre bügenge zamannıñ yaman çire bulğan suğış afäte, anıñ qurqınıç näticäläre turında. Şulay uq, küptän tügel baqıylıqqa küçkän ädip Razıyl Wäliyevqa bağışlanğannarı da buldı.

Oçraşu şiğır’lär, cırlar häm aralaşu belän ürelep bardı. Rkail Zäydulla Törkiyägä uqırğa kilgän tatar qızların universitetnı tögällägännän soñ kire Tatarstanğa qaytırğa çaqırdı.”Sezneñ şikelle belemle yäş’lärgä ixtiyacıbız bar”,-dide ul.

“Tatar qızı Mordoviyä -2023” konkursına ğarizalar qabul itelä başlağan.

24nçe noyabr’dä Saranski şähäreneñ İslam mädäni üzägendä “Tatar qızı Mordoviya-2023” konkursınıñ saylap alu turı uzaçaq. Älege çara inde 4nçe tapqır ütkärelä. Ul, ğadättägeçä, berniçä êtaptan toraçaq. Konkursta tatar qızlarına üzläreneñ iñ yaxşı sıyfatların kürsätergä, intellektları belän balqırğa, aş-suğa häm qul êşlärenä ostalıqların isbatlarğa kiräk bulaçaq. Qatnaşuçılarğa taläplärgä kilgändä, qızlarnıñ 18 yäş’tän 25 yäş’kä qadär buluı, Mordoviyädä yäşäwe häm tatar telen belüe möhim.

Tapşırunı äzerlägändä Tatarstan Räiseneñ matbuğat xezmäte, “Tatar-inform” xäbär agentlığı häm “İntertat” gazetı yazmaları qullanıldı.