Törki cömhüriyätlärneñ kön tärtibendäge waqıyğalar
Awraziya qaytawazı (кaйтавaзы) 60/2023
9 oktäbr’dä Törekmänstan däwlät başlığı Särdar Bärdemöxämmädov Tön’yaq Makedoniya tışqı êşlär ministrı häm Awrupa iminlek häm xezmättäşlek oyışmasınıñ çirattağı räise Buyar Osmanine qabul itte. Söyläşüdä Törekmänstannıñ Awrupa iminlek häm xezmättäşlek oyışması belän xezmättäşlek mäs’äläse qaraldı.
Törkiyä Cömhüriyäte tışqı êşlär ministrı Xaqan Fidan 10-11 oktäbr’ könnärendä Törekmänstanğa räsmi säfär oyıştırdı. Törekmänstan ilbaşı Särdar Bärdemöxämmädov ministr Fidannı qabul itte. Söyläşüdän soñ ilbaşı Bärdemöxämmädovnıñ ozaqlamıy Törkiyägä kiläçäge citkerelde.
11 oktäbr’dä Baqıda Bäysez däwlätlär cämğıyäteneñ 53nçe Milli küzläw oyışmaları cıyılışı uzdı. Cıyılışta regional’ qurqınıçsızlıq mäs’äläse quzğatıldı. Azärbaycan ilbaşı İlham Äliyev cıyılış öçen Baqığa kilgän Küzläw oyışmaları başlıqların qabul itte.
12 oktäbr’ könne Qazaqstan däwlät başlığı Qasıym-Cumart Toqayev “Xalıqara sanlı küper 2023” forumı açılışında qatnaştı. Forumğa 30 ildän 20 meñnän artıq wäkil kilde. Forumda informatika ölkäsendäge innovaŝiyalär turında söyläştelär. İlbaşı Toqayev şul uq könne Forum qısalarında oyıştırılğan Xalıqara sanlı küper texnologiya yärminkäsen qarap çıqtı. Qasıym-Cumart Toqayev aralarında “SpaceX”, Tik Tok ta bulğan xalıqara şirkätlärneñ citäkçelären qabul itte.
12 oktäbr’dä Rusiyä Federaŝiyase däwlät başlığı Vladimir Putin Qırğızstanğa räsmi säfär yasadı. Qırğızstan däwlät başlığı Sadır Caparov häm Vladimir Putin söyläşüennän soñ ike il arasında 7 kileşü imzalandı. Prezidentlar jurnalistlarğa açıqlaw yasadı. Qırğızstannıñ hawa qurqınıçsızlığınıñ Rusiyä tarafınnan saqlanaçağına qarağan kileşüneñ raslanuı belderelde.
13 oktäbr’dä Bişkäktä Bäysez däwlätlär cämğıyäte oçraşuı uzdı. Oçraşuda Azärbaycan, Belarus’, Qazaqstan, Qırğızstan, Rusiyä, Üzbäkstan, Tacikstan häm Törekmänstan ilbaşları qatnaştı. Ärmänstan prem’yer-ministrı Nikol Paşinyan oçraşudan alda däwlät başlığı Sadır Caparovka şaltıratıp, cıyılışta qatnaşmayaçağın äytkän ide.
13 oktäbr’ könne Ärmänstan däwlät başlığı Vaxang Xaçaturyan Rim statusınıñ raslanuına qarağan qanunğa qul quydı. Bişkäktäge oçraşu qısalarında şaqtıy ike yaqlı söyläşülär ütkärelde. Uzğan ayda AQŞ häm Germaniyaneñ Üzäk Aziya illäre belän yuğarı däräcäle oçraşular uzdıruı, Ärmänstannıñ Rusiyädän çitläşä başlawı kebek faktorlar Kreml’ne Bäysez däwlätlär cämğıyäte illärendä tağın da aktiv bulırğa êtärä.
12 oktäbr’ könne Vengriya prem’yer-ministrı Viktor Orban Gruziyağa räsmi säfär oyıştırdı. Viktor Orban Gruziya prem’yer-ministrı İrakliy Garibaşvili belän Gruziyaneñ Awrupa Berlege barışı, Vengriya-Gruziya mönäsäbätläre, regional’ qurqınıçsızlıq mäs’älälären qaradılar. Atna azağında Azärbaycan ilbaşı İlham Äliyev Gruziyağa säfär yasadı.
13 oktär’dä Tön’yaq Kipr Törek Cömhüriyäte däwlät başlığı Ärsin Tatar Azärbaycanğa räsmi säfär belän bardı. Şul uq könne Baqıda Tön’yaq Kipr Törek Cömhüriyäteneñ Mädäniyät häm tanıtu könnäreneñ açılışı yasaldı. 14 oktäbr’ könne Azärbaycan ilbaşı İlham Äliyev häm däwlät başlığı Ärsin Tatar Baqıda küreşep söyläşte.
Abdrasul İsakov
