Törki Cömhüriyätlärneñ kön tärtibendäge waqıyğaları
Awraziya qaytawazı 43/2023
28nçe mayda ütkärelgän saylawda qabat İlbaşı bulıp saylanğan Räcäp Tayyip Ärdoğan berençe çit il säfären 2023nçe yılnıñ 12nçe-13nçe iyün’ könnärendä Tön’yaq Kipr Törek Cömhüriyäte belän Azärbaycanğa yasadı. Şulay itep Türkiyä prezidentınıñ yolası däwam itterelde. Däwlät başlığı Ärdoğan säfär qısalarında Tön’yaq Kipr Törek Cömhüriyäte İlbaşı Ärsin Tatar, Tön’yaq Kipr Törek Cömhüriyäte Baş ministrı Ünal Üstäl häm Azärbaycan İlbaşı İlham Äliyev belän söyläşülär ütkärde.
İlham Äliyev-Räcäp Tayyip Ärdoğan söyläşüe waqıtında Azärbaycan-Türkiyä urtaq universitetınıñ tözelüe mäs’äläsendä êşçänlekneñ alıp barıluı turında äytelde. Jurnalistlarnıñ sorawlarına cawap birüçe İlbaşı Ärdoğan Törki däwlätlär oyışmasın tağın da üsterü häm nığıtu öçen qayber adımnarnıñ yasala alınaçağın belderde. Säfärenä qağılışlı yazma belän urtaqlaşqan İlbaşı Räcäp Tayyip Ärdoğan: “İnşallah, Türkiyä ğasırı ber ük waqıtta törki dönyanıñ ğasırı bulaçaq,” – dip äytte.
2023nçe yılnıñ 13nçe-14nçe iyün’ könnärendä Sämärqand şähärendä Törki däwlätlär oyışması mäğarif ministrlarınıñ 7nçe cıyılışı uzdırıldı. Cıyılışta Azärbaycan, Qazaqstan, Qırğızstan häm Üzbäkstannan ministr häm ministr urınbasarları qatnaştı. Üzbäkstan Mäktäpkäçä häm mäktäp mäğarife ministrı Hilola Umarova Törki däwlätlär oyışması qısalarında Äl Xäräzmi xalıqara yäş’ matematiklar olimpiadasınıñ oyıştırıluın täq’dim itte.
2023nçe yılnıñ 15nçe-16nçı iyün’ könnärendä Taşkent qalasında “21nçe ğasırda Yefäk yulı: zamanca transport häm logistika texnologiyaları” isemle ostaxanä cıyılışı ütkärelde. Cıyılışta Türkiyä, Azärbaycan häm Üzbäkstannan belgeçlär qatnaştı. Ostaxanä cıyılışı waqıtında Taşkent däwlät transport universitetı, İstanbul texnik universitetı häm Azärbaycan texnik universitetı arasında xezmättäşlek protokolına qul quyıldı.
2023nçe yılnıñ 15nçe iyün’ könne Paqıstan Baş ministrı Möxämmäd Şaxbaz Şärif Azärbaycanğa räsmi säfär yasadı. Azärbaycan İlbaşı İlham Äliyıv Paqıstan Baş ministrı Möxämmäd Şaxbaz Şärif belän ike yaqlı häm wäkilleklärara söyläşülär ütkärde.
2023nçe yılnıñ 16nçı iyün’ könne Qırğızstan Däwlät başlığı Sadır Caparov Bişkäktä Fälästin İlbaşı Mäxmüd Abbas belän küreşte. Fälästin İlbaşı Abbas söyläşü waqıtında Qırğızstan belän xezmättäşlekne üsterergä teläwen belderde. Fälästin tışqı êşlär ministrı Riyad Al-Malikineñ avgust ayında Qırğızstanğa säfär yasayaçağı belderelde.
2023nçe yılnıñ 17nçe iyün’ könne Tatarstan Räise Röstäm Miñnexanov Azärbaycanğa säfär yasadı. Röstäm Miñnexanov Qarabaxta oçraşular ütkäräçäk.
Türkiyä belän Azärbaycan arasındağı hawa küperenä yañası östälde. İzmir-Baqı säfärläre başlandı. Baqığa Änkara, Bodrum häm İstanbul şähärlärennän dä barıp citärgä mömkin. “AnadoluJet” bıyıl Änkaradan Törki dönya başqalaları Bişkäk, Taşkent häm Astana şähärlärenä dä oçqıç säfärlären başlatqan ide.
Türkiyä häm Üzbäkstan grajdan aviaśiya ğomum mödirlekläre räsmiläre, İstanbulda cıyılışıp, ike il arasında 5 yaña noqtağa oçış röxsäte birelüe mäs’äläsendä kileşügä ireşte. Bu räweşle törki cömhüriyätlär arasında aviaêlemtä tağın da yışraq buldı.
Täräqqıyätlärdän kürengäne kebek, törki dönyanıñ ähämiyäte xalıqara mäydanda arta bara. Törki cömhüriyätlär arasında xezmättäşlek könnän-kön üsä.
Abdrasul İsakov
