10 yıl êçendä öy êşläreneñ 39%ı robotlarğa küçäçäk

Angliyädäge Oksford universitetı häm Yaponiyädäge Otyanomidzu universitetınnan tikşerenüçelär ütkärgän ber êşçänlekkä qarağanda, 10 yıldan öy êşläreneñ 39%ın robotlar başqaraçaq. Belgeçlär avtomatizaśiyä iñ nıq yoğıntı yasayaçaq êşneñ kibettän azıq-tölek satıp alu buluın farazlıy.

İke uqu yortınıñ tikşerenüçeläre 65 yasalma zihen belgeçennän 10 yıl êçendä öy êşlärendä avtomatizaśiyäläw köçeneñ niçek formalaşaçağı belän bäyle fikerlären soradı. Anda Angliyädän - 39, Yaponiyädän 36 êkspert qatnaştı.

“PLOS One” jurnalında basılğan tikşerenüdä farazlanğança, avtomatizaśiyä bigräk tä markettan satıp alu êşlärenä yoğıntı yasayaçaq. Balalar häm qart keşelärne qaraw isä yasamla zihen texnologiyäläre iñ az ütep kergän alan bulaçaq.  

Azıq-tölek satıp aluğa bülengän waqıt 60%qa kimiyäçäk

Tikşerenüçelär ingliz ir-at belgeçlärneñ, xatın-qız xezmättäşläre belän çağıştırğanda, öy êşlären avtomatlaştıruğa tağın da cılı qarawın,  Yaponiyädä isä wäzğıyät’neñ näq’ kirese buluın açıqlıy. Alarnıñ yasalma zihengä tapşırıla aluın uylawçı êşlär dä törle.

Oksford universitetında doktorlıq dissertaśiyäse yaqlağannan soñ tikşerenüçe bularaq êşläwçe Lulu Şi: “Balalarğa belem birü, alarnı qaraw şikelle êşlärne dä kertep tärbiyäläw tarmağınıñ barı 28%ınıñ avtomatizaśiyälänäçäge uylanıla,”-dide.

Şul uq waqıtta belgeçlär azıq-tölek satıp aluğa sarıf itelüçe waqıtnıñ 60%qa kimiyäçägen farazlıy.

Robotlarnıñ keşelärne 10 yıl êçendä öy êşlärennän qotqaraçağı turındağı süzlär yaña tügel.

Angliyädä êşläwçe ir-atlarnıñ yaqınça yartısı xatın-qız yäş’täşläre qadär ük öy êşlären başqara. Yaponiyädä isä ir-atlar öy êşlären 5%qa azraq êşli.

Oksford universitetında yasamla zihen häm cämğıyät’ mäydanında êşçänleklär alıp baruçı häm ber ük waqıtta tikşerenüneñ avtorlarınnan berse Yekaterina Xertog fikerençä, öy êşläreneñ xatın-qızlar östendä yök bulıp toruı alarnıñ tabışları, aqça êkonomiyäläwe häm layıqlı yalğa çığuına naçar yoğıntı yasıy. Şul säbäple, belgeçlär avtomatizaśiyäneñ artuınıñ xatın-qızlar belän ir-atlar arasında tigezlekneñ dä kübäyüenä kiterä aluın uylıy.

Çığanaq: TRT Haber