Sośial’ medianı artıq küp itep qullanu yalğızlıqqa êtärä
Tormışnıñ qızıqlı yaqları 23/2023
Tormışnıñ qızıqlı yaqları 23/2023
Virtual’ moxittağı küp sandağı äbünäçelär isemlege keşelärdä çın tormışta da küp sandağı keşelär moxitına iyä bulu xisen tudıra. Läkin çınbarlıq küpçelek oçraqta näq’ kiresençä bula. Xätta sośial’ medianı aktiv qullanuçılar tağın da kübräk yalğız häm izolyaśiyälängän tormışqa êtärelä.
Üzara bäyläneştä bulu, layqlarnı alu, tormışındağı möhim mizgellär belän urtaqlaşu. Sośial’ media bügenge kön keşeseneñ waz kiçelmäs iyäläşelgän ğadäte. Xätta üzenä kürä bäylelek. Här kön dönya külämendä millionlağan keşe sośial’ media yärdämendä başqaları belän bäyläneştä tora.
Sośial’ media (социаль медиа) añlı räweştä qullanılğan oçraqta şaqtıy östenleklär täq’dim itä. Bigräk tä keşelärneñ waqıt belän yarışqan çorıbızda êlemtäne ciñeläytä. Läkin sośial’ medianı tığız, intensiv qullanu qayber kimçeleklärne kiterä. Bolardan berse dä sośial’ medianıñ qullanuçılarnı yalğızlıqqa êtärüe.
Keşelär här kön yözlärçä keşe belän êlemtägä kerep tä niçek itep yalğızlıqqa êtärelä soñ?
Yalğız häm izolyaśiyälängän itep xis itügä säbäp bula
Äbünäçelär isemlege bik zur bulsa da barı tik virtual’ moxitta duslıq urnaştırılğanı öçen çın tormıştağısınnan tağın da kübräk keşegä barıp citelä. Fäqät bu üzenä kürä ber aldaw dip añlatıla. Belgeç klinik psixolog Cämrä Äcä Gökpınarğa kürä: “Nigezdä bu qadär äz keşegä ireşüebezgä, yäğ’ni çın, real’ tormıştan ayırılıp, raslaw alu, oşatu, layq alu häm urtaqlaşu ixtıyaclarına yünälüebezgä yul aça.”
“Minnän qala härkem bik yaxşı yäşi”
Sośial’ medianı bik küp qullanuçılarda yäşängän başqa ber aldaw isä, Gökpınar fikerençä: “Minnän qala härkem bik yaxşı yäşi” toyğısı. Gökpınar monı kübräk yäş’üsmerlärdä küzätülären añlata:
“Sośial’ media platformalarında urtaqlaşqannarıbız bolay da keşelärneñ oşatuı telängän äyberlär. Sośial’ medianı qullanuçı keşelär, älbättä, iñ matur, iñ kimçeleksez, iñ yaxşı xällären urtaqlaşqannarı öçen keşelärdä, bigräk tä yäş’lärdä “minnän qala härkem bik yaxşı yäşi” digän toyğı barlıqqa kilä.
Sośial’ medianı añlı itep qullanu kisätüe
Sośial’ media monnan arı modern tormışnıñ waz kiçelmäs öleşe. Tormışıbıznıñ bu qadär êçenä kerep urnaşqan şuşı sośial’ media arqasında yalğızlıqqa duçar bulmawnıñ yulı bar mikän? “Monıñ öçen añlı qullanuçı bulırğa kiräk,” – dip äytüçe Gökpınar wazğıyätne bolay dip açıqlap sala:
“Nigezdä sośial’ medianıñ bik östenlekle häm çınnan da keşegä bik yaxşı yaqları bar. Älbättä, urtaqlaşu, oşatu, raslaw ixtıyacların qanäğätländerä. Ämma bu platformalarda keşe üz xisen bilgele ber däräcädä saqlarğa tiyış. Yäğ’ni başqa keşelär tağın da populyar, tağın da aktiv kebek kürenep, üze ul qadär kürenmi ikän, monıñ barı tik üze tudırğan küreneş buluın abaylap alırğa tiyış keşelär. Şuña kürä sośial’ medianı kübräk qoral bulıp qullanırğa kiräk. Maqsatqa äyländerü döres tügel.”
TRT Xäbär
