Śifrlı çorda virtual’ dön’ya tele

Loot yasaw - virtual’ uyınnarda baylıq qulğa töşerü, level kütärü - xarakternı yuğarı basqıçqa kütärergä tırışu, DMnan messendj alu - başqa uynawçıdan şäxsi xäbär alu… Bu terminnar yaña buınnıñ virtual’ dön’yada qullanuçı qayber süzläre.

Şulay itep, ğailälär balaları awızınnan işetelä torğan moña oxşaş töşençälärneñ niqadärleseneñ mäğ’näsen belä? Virtual’ çorda bala üsterüçe ata-analar bu süzlärne niçek öyränä ala? Alarnı belü nigä kiräk?  

İnternet kiñ tarala, virtual’ dön’ya kön sayın tormışıbızğa tağın da kübräk ütep kerä. Bu xäl yaña xäbärläşü telen dä kiterep çığara.

Loot yasıylar, level kütärälär, iptäşläre belän DM aşa söyläşälär. Yaña buın śifrlı çorda virtual’ dön’ya telen qullana. Tik bolar ata-analarğa añlaşılmıy yäisä säyer toyılırğa mömkin. Bu süzlärne äytsäñ, alar: “Bu çit süz, min işetmädem”, “Bu süzne berençe tapqır işetäm” di.

Üsep kilüçe buın belän ölkännär arasında yäş’ arası niqadär zur bulsa, śifrlı dön’yada qullanılğan teldän dä şulqadär yırağayalar. Xätta qayber ata-analar balaları kerä torğan internet bitlären dä belmi. Facebook, Instagram, Twitternı hiç işetmäwen äytüçelär bar.

Ata-analar, balalarınıñ virtual’ dön’yadağı xäräkätlären belep toru öçen, alar qullana torğan telne dä añlarğa tiyeş.

Sośial’ media häm śifrlı iminlek öyrätü-tikşerenü üzäge citäkçese urınbasarı Levent Êmmingil ğailälärgä bolay dip möräcäğat’ itte: “Śifrlı çorda balalar qullana torğan telne iñ yaxşısı alardan öyränü. Alar belän bu telne öyränüebez alarğa ähämiyät birüebez, yannarında buluıbıznı xis itteräçäk”.

Şulay da, balaları qullana torğan töşençälärne belü ğailälärgä närsä birä soñ? Levent Êmmingil: “Monda ähämiyätle noqta - balalar belän yaxşı êlemtä qoru. Çönki alarnıñ dön’yasınnan yıraqlaşmaw öçen alar qullanğannı öyränergä häm belergä kiräk”,-di. 

Belgeçlär ber ük waqıtta bu aralaşunıñ ğailä êçendäge bäyläneşlärne dä nığıtaçağına basım yasıy.

Çığanaq: TRT Xäbär