Balıqlı kül
Bolarnı beläsezme? - 7/2022
Bolarnı beläsezme? 7/2022
Kön’yaq - könçığış Anadolu töbägendäge Şanlıurfa şähäreneñ tarixı belän bergä rivayät’ - legendaları belän dä dan totqanın beläsezme?
Xikäyäse, manzarası, çista, saf hawası häm arxitekturası belän iskitkeç atmosferağa iyä Şanlıurfa legendaları häm tarixı belän dä tanılğan şähär. Här poçmağında tarixnıñ ber öleşen tabarğa mömkin bulğan şähärneñ iñ tanılğan urınnarınıñ berse - Balıqlı kül. Şanlıurfanıñ turizm üzäkläreneñ berse bulğan Balıqlı külneñ ozınlığı – 150 metr, kiñlege - 30 metr häm tiränlege - 5 metr. Kanallar belän totaşqan ike zur basseynnan torğan Balıqlı kül nigezdä ağımsuğa barıp totaşa häm şähärne äylänep çığa. Annarı il çiklären uzıp Süriyägä taba däwam itä. 6 nçı ğasırğa qadär mondağı keçkenä yılğalardan kilgän sular bu küldä cıyılğan. Ul waqıtta bulğan su basuda küp keşe ğomeren yuğaltqaç Vizantiya imperatorı bu xälne çişü öçen İstanbuldan injenerlar cibärä. Başqa su basularğa qarşı divar tözelä, su cıyılunı buldırmas öçen kanal qazıla häm problema çişelä.
Balıqlı külneñ rivayät’lär teması bulğan balıqları xalıq arasında izge sanala häm bu balıqlarnı aşawçılarnıñ awıruı äytelä. Küldä mıyıqlı sazan balığı bar, bu törneñ ikrası ağulı bulğanlıqtan keşe sälamätlege öçen qurqınıç. Rivayät’lärgä qarağanda, 3 ibrahimi dinneñ atası dip sanalğan Xäzräti İbrahim monda utqa ırğıtıla häm moğciza bulıp ul kilep töşkän cir külgä, yanğan utınnar balıqlarğa äwerelä. Balıqlı kül platosında Xäzräti İbrahim tuğan mäğarä dä bar. Şuña kürä biregä yılnıñ teläsä qaysı waqıtında törle illärdän häm dinnärdän küpläp keşe kilä.
