Tatarstanda umartaçılıq, “Tübätäy” tramvayı häm Räsäyneñ iñ zur bäleşe

Tatarstan xäbärläre – 13/2022

1850892
Tatarstanda umartaçılıq, “Tübätäy” tramvayı häm Räsäyneñ iñ zur bäleşe

ТӨРКИЯ AШA ТAТAРCТAН ҺӘМ ДӨНЬЯ XӘБӘРЛӘРE / TÖRKİYÄ AŞA TATARSTAN HÄM DÖN'YA XÄBÄRLÄRE 28.06.2022 13:00 PODKAST

Tatarstanda iñ zur bäleş

Tatarstannıñ Baltaç rayonında Räsäy külämendä rekordlı bäleş peşergännär.

“Xezmät” saytı beldergänçä, Baltaçta bäleş peşerüdä Rusiyä külämendä rekord quydılar – 71 kilogrammlı boray bäleşe peşerdelär.

“Bäleş peşerü öçen maxsus miç çığardıq, çönki ber metr diametrlı tabanı sıydırır öçen ğadi miç kenä turı kilmi. Tabası da şuşı çara öçen maxsus äzerlände. Anıñ awırlığı 58 kilogramm. Bäleş peşerer öçen qızuı çitsen dip miçkä öç täwlek buyı yaqtıq”, - dide peşerüçelär.

Tatarstan başqalasında “Tübätäy” tramvayı

Tatarstan başqalası Qazanda “Tübätäy” isemle êkskursiya tramvayı êşli başladı, dip xäbär itä “Tatar-inform” agentlığı. Tramvay kön sayın Qazan-1 timer yul vokzalınnan 17.00 säğat’tän yöri başlıy. Bu xaqta “Metroêlektrotrans” general’ direktorı Aydar Ğabdelxaqov “Tatar-inform”da uzğan matbuğat konferenśiyäsendä xäbär itte.

“2nçe marşrut buyınça “Tübätäy” êkskursiya tramvayı êşli başlıy. Bu 1986nçı yılda çığarılğan РВЗ vagonı, Qazanda 1961nçe yıldan birle êşli torğannardan. Bu qızıl-sarı vagonnar, alar 400dän artıq ide, üz waqıtında Qazannıñ vizit kartoçkası buldı”, - dip söyläde spiker.

Ğabdelxaqov süzlärençä, bu tözekländerelgän raritet vagon. Êkskursiya waqıtı timer yul vokzalınnan yılğa portına qadär häm kiregä 45 minut däwam itäçäk. “Yılğa portında öç minut häm kire yulğa. Bu stil’läşterelgän vagon, anda muzıka uynayaçaq. Tramvayda audiogid bula häm êkskursiyadä qatnaşuçılar öçpoçmaq, öleş häm êçemlektän torğan cıyılma alaçaq”, - dide predpriyätiyı general’ direktorı.

Ul êkskursiya biletı 500 sum toraçaq, dip açıqlıq kertte. “Qazanlılar häm şähär qunaqları arasında älege vagonda yörügä ixtıyac bulır dip kötäbez”, - dip yomğaqladı spiker.

Tatarstanda bıyıl bal bulırmı?

“Watanım Tatarstan” gazetı Gölsinä Xäbibullinanıñ “Umartaçılar cäyı: ballımı?” dip atalğan yazmasında Baltaç rayonınıñ iñ täcribäle, tanılğan umartaçılarnıñ berse – Tübän Kenädän Aydar Sämigullin belän umartaçılıqtağı mäşäqat’lär turında ütkärelgän äñgämä täq’dim itä.

Bıyılğı soñğa qalğan yaz, cäy umartaçılarnı borçuğa salmağanmı? Cäyge sezon ballı bulırmı? Arça rayonında küpläp bal qortları ağulanğan, säbäp nida?

“Minem üzemneñ 2010nçı yıldan birle mondıy yıl kürgän bulmadı, täcribäle umartaçılar ğomergä mondıy yaznı, cäy başın kürgän yuq, dilär. Açlıqtan oya-oya qortları ülep betkän keşelär dä bulğan. Şöker, beznekelär äybät qışladı. Ülem-kitem öç prośent tiräse genä buldı. Bu – bötenläy yuq digän süz inde. Qışlatuğa kilgändä, bez qortlarnı öylärgä kertmibez. Tışta, qar belän kümep qaldırabız. Qar astında salqınlıq 5–6 gradustan artmıy, şuña kürä salqın qış ta alarğa zıyan salmıy. Mart azağında isä, çañğı belän menep, qardan çistartabız, territoriyägä köl sibäbez, üzebezçä reviziya yasıybız”, - dip añlatuçı täcribäle umartaçı: “Xezmätlärebez cilgä oçmasın, ömetlär aqlansın inde”, - dip teläklären citkerä.

Tatarstanda Yakut-Saha kinosı könnäre

Tizdän Tatarstanda yakut kinosı kürsätelä başlayaçaq, ä Yakutiyädä Tatarstan fil’mnarı kürsätelde. Bu turıda “Tatar-inform” agentlığınıñ Ruzilä Möxämmätova yazmasında citkerelä:

“Tatarkino” häm “Saxafil’m” arasında kileşü imzalandı. “Sezdä muniśipal’ kinoteatrlar buluı bik yaxşı, dimäk, däwlät yuğarılığında prokat yasarğa mömkin”, - dide Yakutiyäneñ mädäniyät häm ruxi üseş ministrı Yuriy Kupriyanov Yakutiyädä Tatarstan könnäre barışında “Tatar-inform” xäbärçesenä.

“Bezneñ urtaqlıqlar bik küp, telebez dä bik yaqın. Bügen Yakutskiyda “Tatarlarda qunaqta” kürgäzmäse açılğanda Prezident Röstäm Miñnexanov ber malayğa “Kil monda” dip tatarca äytkäç, min yanına barmaqçı idem, çönki bu süzlär saxa telendä dä şulay yañğırıy”, - dip däwam itte ul.

Alinä Zahitova master-klasslar ütkärä

2018nçe yılğı figuralu şuu olimpiya çempionı Alinä Zahitova yäş’ figuralı şuu ostaları öçen master-klasslar ütkäräçäk. Bu xaqta “TeamZagitova” telegramm-kanalı xäbär itä, dip yaza “Tatar-inform” agentlığı:

"9nçı iyül’dä master-klass Sankt-Peterburgta, 11nçe iyül’dä Tulada häm 13nçe iyül’dä Kalugada uzaçaq."

Qazannan yaña oçqıç säfärläre

Tatarstan başqalası Qazannan yaña oçqıç säfärläre başlıy.

“Tatar-inform” xäbärenä qarağanda, yaña aviareyslar Qazannı Krasnoyarsk häm Samara belän totaştıraçaq. Oçışlar atna sayın yäkşämbe könnärendä cäyge cädwäl ğamäldä bulğan çorda başqarılaçaq.

Tatarstanda imin sıyfatlı yullar

Tatarstanda bıyıl yul êşlärenä 60 milliard sumnan artıq aqça cibäreläçäk. Bu xaqta Tatarstan transport häm yul xucalığı ministrı urınbasarı Artyom Çukin “Tatar-inform” matbuğat konferenśiyäsendä xäbär itte.

“Tatarstanda bıyıl yul êşläre programması buyınça 60,4 milliard sum qaralğan, şul isäptän federal’ byudjettan 28 milliard sum häm Qazanda zur ob’yektlarnı ğamälgä aşıru öçen alınğan infrastruktura byudjet kreditların isäpkä alıp, töbäk byudjetınnan 32,4 milliard sum”, - dip söyläde spiker.

Törkiyä kürgäzmäsendä tatar fotoğrafı häm miläş belän igdä ağaçları

Küzätüebezne Törkiyä häm Törkiyädä ğomer itüçe tatarlar turında Tatarstan matbuğatında çıqqan yazmalar belän tögällibez.

“Änkarada tuıp üskän millättäşebez Mäsüt Arslanbäkneñ biş äsäre 27 fotografnıñ ike meñ xezmäte arasınnan saylap alınğan”, - dip yaza “Tatar-inform” agentlığı xäbärçese Ruşaniya Altay:

“Törkiyäneñ başqalası Änkarada “Adım sayın Änkara” dip isemlängän fotosürät kürgäzmäsendä millättäşebez Mäsüt Arslanbäkneñ xezmätläre urın alğan. Bu xaqta ENFOD çikläwsez fotosürätçelär cämğıyäte xäbär itä.

Xäbärçeneñ başqa ber yazmasında “Törkiyädä miläş, igdä ağaçlarına qağılışlı tatar-törek urtaq yolaları tikşerelde”, - dip citkerelä:

“Törkiyäneñ Qavqaz universitetı belän “Êlger” xalıqara fänni üzäk oyıştırğan 27nçe Xalıqara fänni simpoziumda Çulpan Zarif-Çetin tatarlardağı miläş häm töreklärdäge igdä (yalğançı sırğanaq) ağaçlarına qarağan yolalar turında doklad belän çıqtı.

Doklad Qazan Federal’ universitetı ğalimäse Miläwşä Xäbetdinova belän urtaq äzerlängän.

 
 


Bäyläneşle xäbärlär