Tatarstanda ikmäk bäyäläre, yaña tuuçılar häm Törkiyägä biletlar

Tatarstanda tuuçılar kimegän

Tatarstanda 2022nçe yılnıñ berence dürt ayında tuuçılar sanı kimegän. Bu turıda “Tatar-inform” agentlığı xäbär itä:

“Tatarstanda 2022nçe yılnıñ ğıynwar-aprel’ aylarında tuuçılar sanı uzğan yılnıñ şul uq çorı belän çağıştırğanda 8,5%qa kimegän.

2022nçe yılnıñ berence dürt ayında respublikada 11 meñ 706 bala tuğan.

2022nçe yılnıñ aprel’ ayında Tatarstanda tuuçılar sanı 2021nçe yıl belän çağıştırğanda 14,9%qa kimegän.

Tatar kitabı yortında yaqtı istäleklär quşılması

Şul uq agentlıqnıñ başqa ber yazmasında citkerelgänçä, 16nçı iyün’dä Tatarstan başqalası Qazandağı Tatar kitabı yortında “İstälek öçen” dip isemlängän konśert-spektakl’ buldı. Bu tamaşa – xislärgä bay, saf mäxäbbät tulı şiğ’riyät, lirik cırlar, yaqtı istäleklär quşılması, diyılä Tatar kitabı yortı xäbärendä.

Tamaşanıñ poêtik-dramatik tuqımasın klassik häm yäş’ tatar şağıyr’läreneñ mäxäbbät, duslıq, xıyanät, tormış, yäşäyış turındağı şiğır’läre täşkil itä. Konśert programmasında – şul uq temağa qağılışlı xalıq häm retor-cırlar bar, diyılä xäbärdä.

“Töslärdä milli xislär” kürgäzmäse

15nçe iyün’ könne Tuqay ädäbi muzeyınıñ kürgäzmälär zalında, “Tatar-inform” agentlığı mäğ’lümatenä kürä, Tatarstan Cömhüriyäteneñ xalıq rässamı Mödäris Minhacevnıñ “Töslärdä milli xislär” dip atalğan kürgäzmäse açıldı.

Kürgäzmä rässamnıñ yartı ğasırlıq icadi êşçänlegenä bağışlana. Rässamnıñ üz xalqına, anıñ tarixına ixtiramı, milli ğoref-ğadätlärgä tuğrılığı kürgäzmädä tamaşaçılar xozurına täq’dim itelgän êşläreneñ töp êçtälegen bilgeli, dip xäbär itä muzeynıñ matbuğat xezmäte.

Qazan – iñ qunaqçıl şähärlärdän berse

Tatarstan başqalası Qazan iñ qunaqçıl 5 şähär isemlegenä kerde, dip xäbär itä “Tatar-inform” agentlığı.

Qazan Rusiyäneñ iñ qunaqçıl şähärläre reytinğında bişençe urınnı aldı.

Rusiyäneñ törle şähärlärendä yäşäwçelärdän alar yäşägän şähärdä turistlar ağımınıñ artuına mönäsäbätlären soraşqannar. Qazanda yäşäwçe cawap birüçelärneñ 53% uñay cawap birgän.

Tatarstan başqalasında soraştıruda qatnaşuçılarnıñ 22% turistlar ağımı artuğa qarşı buluların beldergän.

Törkiyägä biletlar satılıp betkän

“Watanım Tatarstan” gazetınıñ Dinä Ğıylaciyıva yazmasında isä Tatarstannan Törkiyägä yal itärgä barırğa teläwçelär turında mäğ’lümat citkerelä. Gazet yazuınça,“Bügen rusiyälelär arasında populyar bulğan Törkiyägä biletlar cäy urtasına qadär satılıp betkän” ikän.

Belgeçlär Törkiyädä yal itärgä teläwçelärneñ küplegen başqa illärgä çığu mömkinlege çikle bulu belän añlata. Törkiyädä ike keşegä un kön yal itü urtaça 150 meñ sumğa töşä. Bu uzğan yılğı xaqlar belän çağıştırğanda 20%qa kübräk.

Rusiyäneñ turoperatorlar assośiyase mäğ’lümatlarına qarağanda, bügen biredäge kurortlarğa ilneñ 17 şähärennän sigez aviakompaniya oçqıçlarında barıp citep bula.

İyün’neñ berence atnasında Törkiyägä Rusiyädän barlığı 100 meñnän artıq turist utırğan 452 reys kilgän. Turoperatorlar assośiaśiyäse belgeçläre iyün’ azağına qadär biredä barlığı 500 meñnän artıq rusiyäle yal itär dip farazlıy. Bu 2019nçı yılnıñ şul uq çorı belän çağıştırğanda 42%qa azrak. Belgeçlär monı çikläwlär arqasında bik küp kenä hawa yulları, reyslar sanı çiklänü näticäse dip bäyäli. Törkiyä kurortlarına soraw isä çınlıqta êlekkeçä ük zur, dip ışandıra alar.

«Küp kenä turoperatorlar Törkiyägä biletlarnı iyül’ azağına qadär ük satıp betergän. Turistlarnı bäyälärneñ artuı da qurqıtmıy. Bügen alar putyovkalarnı teläsä-nindi bäyädän satıp alırğa da äzer.

Bügen Törkiyägä yullama sorawçılar sanı täq’dimgä qarağanda küp märtäbä zurraq”, - diyılä assośiaśiya xäbärendä.”

Tatarstanda ikmäk bäyäläre artuı kötelmi

“Watanım Tatarstan” gazetı Zöhrä Sadıyqovanıñ “Awız aqçağa qarap açıla: keşelär qamır rizıqları häm ğadi yäşelçälär aşawğa küçä” isemle yazmasın täq’dim itä:

“Soñğı berniçä atnada yäşelçä (qıyar, käbestä, pomidor, çögender, kişer), yomırqa häm şikâr xaqları töşkän. Ä menä suğan, bäräñge, alma, banan bäyäläre artqan. Şulay uq ker yuu poroşoğı, şäxsi gigiyına äyberläre häm şırpığa da xaqlar kütärelgän”.

Gazet Tatarstan awıl xucalığı häm azıq-tölek ministrı Marat Cäbbarovnıñ: “Yaqın aralarda cömhüriyättä ikmäk bäyäläre artuı kötelmi”, - digän süzlären dä citkerä.

Tatarstan belän Üzbäkstan arası

Şul uq gazetnıñ “Tatarstan belän Üzbäkstannı närsä bäyli?” isemle yazmasında isä ike cömhüriyät arasındağı bağlanışlar turında mäğ’lümat birelä:

“Añlaşırğa bik ciñel, êşlärgä yünäleşlär küp. Tatarstan belän Üzbäkstan arasın yaqınaytıp, Qazanda ike könlek êşlekle oçraşular uzdı.

Tatarstan Däwlät Şurası räise Färit Möxämmätşin Üzbäkstan Qanun çığaru palatasınıñ Rusiyä Däwlät Duması belän xezmättäşlek citäkçese İlxom Abdullayıv citäkçelegendä Tatarstanğa kilgän Üzbäkstan parlamentı xalıq ışanıçlıları belän oçraştı, täcribä urtaqlaştı.

Çarada Tatarstan İlbaşı Röstäm Miñnexanov ta çığış yasadı.

Tatarstan belän Üzbäkstan arasın tovar äyläneşe dä nığıtıp tora. Uzğan yılda ike cömhüriyät arasındağı tovar äyläneşe 193 million dollardan artıp kitkän. Üseş kürsätkeçe - 23,5%.

- Üzbäk telen belgän keşe tatarçanı bik tiz öyränäçäk. Tel bik möhim närsä ul. Üzbäkstandağı kollegalarım söyläşkändä dä ber-berebezne añlıybız, - dide Tatarstan Däwlät başlığı. Qunaqlarnıñ qaysıları kiläse oçraşularğa tatarçanı da otıp kiläçägen äytte.

Tatarstan sänäğät häm säwdä ministrı Oleg Korobçenko da Üzbäkstan belän xezmättäşlek itüneñ yaña yulları küp, di. Ul ike yaq öçen dä otışlı bulaçaq. Üzara täcribä, belgeçlär belän urtaqlaşu möhim. Turizm yünäleşeneñ dä zur üseştä buluın bilgeläp ütäse kilä, - dide ministr."

Saha-Yakutiyädä Tatarstan kinosı könnäre

“Matbuğat.ru” saytı xäbär itkänçä, Yakutiyädä Tatarstan kinosı täq’dim iteläçäk:

“Tatarstan kino ähelläre Röstäm Miñnexanov citäkçelegendäge zur delegaśiya belän Saha (Yakutiya) cömhüriyätendä Yakutsk ASSR oyışuğa 100 yıl tulu uñayınnan uzaçaq Tatarstan könnärenä yul tota.

Yakutiyädä Tatarstan kinosı könnäre 22nçe iyün’dä “Lena” kinoteatrında “Äpipä” muzıkal’ komediyäse belän açıla. Annarı yakut tamaşaçıları İldar Yağ’färovnıñ Qazan xalıqara möselman kinosı festivale büläklärenä layıq bulğan “İsänmesez?” dramatik fil’mın küräçäk.”

Törkiyädä Sabantuy häm Ğabdelcabbar Qandalıy

Küzätüebezne Törkiyä häm Törkiyädä ğomer itüçe tatarlar turında Tatarstan matbuğatında çıqqan yazmalar belän tögällibez.

“İskeşähär töbägendäge Osmaniya (Quruhöyük) tatar awılında ütkän Saban tuyına Törkiyäneñ törle şähärlärennän meñgä yaqın keşe cıyıldı”, - dip xäbär itä “Tatar-inform” agentlığı xäbärçese Ruşaniya Altay.

Törkiyädäge tatar awılı Sabantuyına tatar sänğat’ ähelläre Rezeda Töxfätullina, Yaramir Nizametdinov häm “Säydäş” törkeme biyüçeläre tatar cır-biyüläre belän çığış yasadı.

“Tatar-inform” agentlığı xäbärçeseneñ başqa ber yazmasında isä Tatarstan ğalimäse Ruziyä Safiullinanıñ Ğabdelcabbar Qandalıy icatı turındağı mäqaläseneñ Törkiyädä näşer itelgän fänni mäqalälär cıyıntığında basılıp çığuı turında äytelä:

“Ruziyä Safiullinanıñ mäqaläse “Şağıyr’ Ğabdelcabbar Qandalıy häm tatar ädäbiyatınıñ yaña zaman ädäbiyatına küçeşe” dip atala. Ğalimä bu mäqaläse belän “Êlger” xalıqara fänni üzäk belän İskeşähärdäge Osmangazi häm Kars şähärendäge universitetları oyıştırğan 26nçı xalıqara fänni simpoziumda çığış yasağan ide.”

Tatarstannıñ atqazanğan sänğat’ êşleklese, “Bolğar” radiosı tapşıruları alıp baruçısı, şağıyrä Şämsiyä Cihangirova Törkiyädä 14nçe xalıqara törki şiğriyät festivalenä çaqırılğan. Bu xaqta “Tatar-inform” agentlığına şağıyr” Rämis Aymät xäbär itä.

İstanbuldağı festivalgä 30dan artıq ildän 80gä yaqın şağıyr’ çaqırılğan.

Tatarstanda tabiğat’ baylığı häm awılda öy satıp alu mömkinlege | TRT Tatarça

 

Tatarstanda xalıq sanı, oçqıç-poyızd säfärläre häm metro bäyäse | TRT Tatarça