Ğosmanlı istälege - Söläymaniyä kölliyäse

İstanbulnıñ iñ ähämiyätle Ğosmanlı istäleklärennän berse  - Söläymaniyä kompleksınıñ üz çorında möhim mäğarif uçağı buluın belä idegezme?

Kanuni Soltan Söläyman häm Mimar Sinannıñ ul däwergäge köç simvolı belän arxitektur dahiligeneñ bergälege bulğan Söläymaniyä kölliyäse - Ğosmanlı patşalığındağı iñ zur komplekslardan berse. Ul törle fän tarmaqları bergä uqıtılaçaq ähämiyätle belem üzäge itep dizaynlanğan.

Söläymaniyä kölliyäsen 1550nçe yılda tözi başlıylar häm 7 yılda tögällilär. Ul iq’tisadi häm mädäni funkśiyäläre belän klassik çor simvolı sanala. Kompleksnıñ törle tarmaqlarda belem birüçe 7 mädräsäseneñ êçendä şifa taratuçı Mediśina mädräsäse dä urın alğan. Anıñ uñ yağındağı qorılma isä xastaxanä. Şunda uq daruxanä belän xamam da bula. Bu xastaxanäneñ Ğosmanlıdağı başqa däwalaw uçrejdeniyelärennän töp ähämiyätle ayırması  - aqıl xastalıqları büleme. Anda awırularnı maxsus darular häm muzıka belän dawalıylar.

Söläymaniyä kölliyäsendäge iñ küz yawın aluçı bina, älbättä, Söläymaniyä mäçete. Ul, Mimar Sinannıñ başqa äsärläre şikelle, üze ğadi, üze iskitkeç. Mäçet işegaldınıñ 4 poçmağında urın alğan 4 manara Kanuninıñ İstanbulnıñ yawlap alınuınnan soñ dürtençe padişah buluın, 10 şäräfä (manara balkonı) isä anıñ Ğosmanlınıñ unınçı xökemdarı ikänen simvollaştıra.

Kompleks êçendä, monnan tış, Kanuni Soltan Söläyman, Xürräm soltan häm Mimar Sinannıñ törbäläre urın ala.