Hindstan ilbaşınıñ Törekmänstanğa täwge säfäre

Ağımdağı yılnıñ 1nçe-4nçe aprel’ könnärendä Hindstan däwlät başlığı Şri Ram Natx Kovind räsmi ziyärät belän Törekmänstanğa bardı. Bu – Törekmänstan bäysezlegen alğannan birle älege ilneñ däwlät citäkçelärennän täwge vizit ide.

Yaña saylanğan ilbaşı Särdar Bärdimöxämmätov 1nçe aprel’dä Hindstanlı wazıyfadaşın aêroportta tantana belän qarşı aldı.

2nçe aprel’dä ike lider Oğuzxan sarayında qara-qarşı utırıp söyläşte. Soñınnan delegaśiyälärara oçraşu buldı.  Anda ikeyaqlı mönäsäbätlär häm regional’ mäs’älälär qaraldı. Liderlar Törekmänstan – Hindstan xökümätlärarası säwdä häm iq’tisadi, fänni häm texnik xezmättäşlek komissiyäseneñ mönäsäbätlärne kiñäytüdä ähämiyätle rol’ uynawın belderde. Hindstan ilbaşı Kovind ileneñ neft’ citeşterü, ğaläm häm śifrlaştıru mäs’älälärendä Törekmänstanğa yärdäm itä aluın citkerde. Ul Särdar Bärdimöxämmätovnı üzlärenä çaqırdı.

Oçraşulardan soñ ike däwlät arasında 4 memorandum imzalandı.    

Hindstan ilbaşı Kovind 3nçe aprel’dä Törekmänstan tışqı êşlär ministrlığına qarawçı Xalıqara mönäsäbätlär institutına bardı, anda êşläwçelär häm uquçılar belän aralaştı.

Kovind, säfäre qısalarında, Törekmänstanda hind telen öyrätüçe häm ileneñ mädäniyäten tanıtuçı oyışmalarğa da bardı. Söyläşülärdän soñ törekmän yäş’läreneñ Hindstan – Urta Aziyä sammitında qatnaşaçağı açıqlandı. Moña qadär 400dän artıq törekmänneñ Hindstanda belem aluı häm staj uzuı belderelde.

Törekmänstan häm Hindstan BMO, Urta Aziya-Hindstan dialogı qısalarında da mönäsäbätlären üsterä. Regional’ häm global’ mäs’älälärdä ike däwlätneñ dä qaraşları oxşaş. Monı säfär waqıtında liderlar da assızıqladı.

Törekmänstan, ênergetika êksportın törleländeräçäge öçen, TAPİ (Törekmänstan-Äfğanstan-Paqıstan-Hindstan) tabiğıy gazütkärgeçe proyektına zur ähämiyät birä. Anıñ Törekmänstandağı berençe êtabın täşkil itüçe ütkärgeç salu êşçänlege tämamlandı. Äfğanstandağı totrıqsızlıq proyektnıñ ikençe êtabına kirtä quydı. Hindstan idaräse älege ilneñ xakimiyäten üz qulına alğan Talibanğa cılı qaraşta tügel. Şuña kürä TAPİ proyektınıñ tögällänüe äle ozaq yıllarğa çigerelergä mömkin.  

Xalıqara Tön’yaq-Kön’yaq transport koridorı ike däwlät mönäsäbätläreneñ ähämiyätle öleşen täşkil itä. Hindstan, İrandağı Çabaxar portına kertem yasap, Urta Aziyä illäre häm Awraziyäneñ tön’yağı belän könbatışına qısqa yuldan ireşergä teli. Törekmänstanda tranzit il bularaq älege proyektta urın almaqçı häm tizdän Çabaxar portı urtaq êşçänlek törkemenä üz wäkilen cibäräçäk.

Hindstan ilbaşınıñ Törekmänstanğa säfäre - Yaña Dählineñ Urta Aziyä däwlätläre belän qızıqsınuı artuınıñ kürsätkeçe. Soñğı 30 yılda ike arada mönäsäbätlär telägän biyeklekkä menä almadı. Tik xäzer anıñ yaña däräcägä kütärelü mömkinlege bar. Çönki soñğı yıllarda Hindstan da, Urta Aziyä dä bu mäs’älädä nıqlı adımnar yasıy başladı.   

Yomğaqlap äytkändä, Hindstan ilbaşı Şri Ram Natx Kovindnıñ Törkmänstanğa säfäre ikeyaqlı häm regional’ mönäsäbätlärneñ üseşe, Urta Aziyä – Hindstan dialogınıñ tağın da näticäle êşläwe nisbätennän faydalı buldı.