BMOda törek räis

Bügenge yazmabızda süz Törkiyä kandidatı Volkan Bozkırnıñ BMO ğomum şurası räise bularaq saylanuı turında baraçaq.

2020nçe yılnıñ 17nçe iyünendä ütkän saylawda Törkiyäneñ uzğan yıl kandidat itep kürsätkän ilçese Volkan Bozkır 192 däwlättän 178eneñ tawışın aldı. Ul BMOnıñ 75nçe ğomum şura räise buldı. Törek çığışlı diplomatnıñ bu däräcäle urınğa saylanuı - ğorurlıq.

Bozkır beldergänçä, saylaw ciñel genä ütmägän. Anıñ namzäte Könbatış Awrupa häm başqa törkemnärdä başta raslanğan. Ämma soñınnan Greśyä, Kön’yaq Kipr häm Ärmänstannıñ doşmança mönäsäbäte üzeneken itä. Monnan êlek ğomum şurada alqışlaw ısulı belän saylanğan utırış räisen bıyıl tawış birü yulı belän bilgelilär. Ämma anıñ näticäläre Törkiyägä qarşı buluçılarnıñ käyefen bik qatı qırdı.

Törkiyä Böyek Millät Mäclese tışqı êşlär komissiyäse räise wazıyfasındağı Volkan Bozkır 1972nçe yıldan başlap törle diplomatik missiyälär başqara. Ul kübräk Könbatış däwlätlärendä xezmät itä. Ämma Awraziyä illäre belän dä yaqın xezmättäşlege bar. Bozkır Törkiyä-Rusiyä sośial’ forumı räistäşe wazıyfasın da başqara.

Diplomat TBMM tışqı êşlär komissiyäse räise bularaq Awraziyä illäre belän ikeyaqlı häm öçyaqlı cıyılışlarnıñ ütüen täêmin itte. Şulay uq, Awraziyä däwlätläreneñ Änkaradağı ilçeläre belän yaqınnan êşçänlek alıp bardı häm regionğa säfärlär yasadı. Älege illärneñ parlament wäkilläre belän ikeyaqlı mönäsäbätlärne yaña däräcägä çığaruçı söyläşülär ütkärde. Törkiyä-Azärbaycan-Gruziyä, Törkiyä-Rusiyä-İran parlamentı tışqı êşläre komissiyäläreneñ öçyaqlı cıyılışların alıp bardı.

Volkan Bozkırnıñ BMO ğomum şurası räise saylanuı, Ärmänstan tışında, barlıq Awraziyä däwlätlärendä uñay qarşılandı häm monıñ belän bäyle xäbärlär yasaldı. Wazıyfadaşları häm regionnıñ xalıqara oyışmaları qotlawnamälär yulladı. Törki şura, TürkPA, TÜRKSOY, Törki akademiyä, Törki mädäniyät häm miras waqıfı şikelle törki dön’yanıñ urtaq xalıqara oyışmaları Volkan Bozkırnı täbrik itte.

2020nçe yılnıñ 18nçe iyünendä Törki şura ğomum särqatibe Bagdad Amreyev, Volkan Bozkırnı qotlap, BMO tarixında täwge tapqır törki dön’yadan ber wäkilneñ BMO ğomum şurasına räis saylanuınıñ tarixi waqıyğa buluın assızıqladı. Törki dön’yanıñ xalıqara oyışmalarınıñ monnan soñ BMO belän mönäsäbätläreneñ tağın da nığıyaçağın äytä alabız.

Monnan alda törki cömhüriyätlärdän Qazaqstannıñ xäzerge ilbaşı Kasım Cömärt Tokayev 2011nçe-2013nçe yıllarda BMO ğomum särqatibe urınbasarı wazıyfasın başqardı.

Volkan Bozkırnıñ BMO ğomum särqatibe buluı böten törki dön’yanıñ xalıqara diplomatiyädäge unışı şikelle qabul itelä. Ul Qırımnıñ annekśiyäse, uyğır mäs’äläse, Kön’yaq Kipr törek cömhüriyäten tanu şikelle törki dön’yanıñ BMO qanatı astında xäl itelergä tiyeşle mäs’älälären çişügä öleş kerter dip kötelä. Pandemiyä däwam itüçe ğadättän tış çorda xezmätkä kereşüçe Bozkırnı global’ iq’tisadi krizis, möhacir probleması şikelle zur mäs’älälär kötä. 50 yılğa yaqın diplomat täcribäse belän ul BMOnı tağın da funkśional’ xälgä kiterer dip uylanıla.

Avtor: Abdrasul İsakov