Sulı kätlit

Törek aş-sularınıñ alıştırğısız rizıqlarınnan berse - köftä. Bezneñçä, kätlit. Waqlanğan itne tämlätkeçlär belän aralaştırıp peşerü näticäsendä barlıqqa kilgän älege läzzätle rizıqnıñ Törkiyädä 300gä yaqın töre bar. Här cirlekneñ üzenä xas, üz iseme belän ataluçı kätlite bar disäk yalğış bulmas. Tapşıruıbızda êlegräk töp kätlit reśeptı belän urtaqlaştıq. Bügen isä kästrül’dä xäzerlänüçe “sulı kätlit” yäisä frikadel’ka peşerergä öyränäbez. Ul Anadolunıñ teleñne yotarlıq rizıqlarınnan berse, öydä dä peşerelä, restoran menyularında da urın ala.

Başta sulı kätlitlärebezne äzerläw öçen kiräkle azıq-töleklärne sanap çığabız:

300 gramm tartqan it

1 danä waq itep turalğan suğan

1-2 teş töyelgän sarımsaq

yartı stakan waqlanğan talqan yarması

1 bal qalağı toz

bal qalağı oçında qara borıç

qızıl borıç häm änis orlığın da qalaq oçı belän salabız

2 danä şaqmaqlap turalğan bäräñge

2 qaşıq on

2 qaşıq tomat pastası

Kätlitlärebezne xäzerlärgä çirät citte. Başta tarttırılğan itkä talqan yarması, töyelgän sarımsaq, tämlätkeçlär häm toznı salıp äybätläp izäbez. Şunnan soñ anı 15 minut yal itteräbez. Annarı ittän keçkenä öleşlär qubarıp alıp uçta tügäräkläp diametrı yaqınça 2 santimetr zurlığındağı şarçıqlar yasıybız.

Onnı ber kiñ zur tabağa salabız. Yasalğan kätlitlärne şunda tezäbez häm tabanı selketep barlıq kätlitlärne onda äwälibez.

Kiñ kästrüldä turalğan suğannarnı sıyıq mayda 3-4 minut qızdırabız. Yomşağan suğannar yanına tomat pastası, toz häm şaqmaqlap turalğan bäräñgene östäp tağın 2 minut qızdırabız.  Annarı tabağa cılı su salıp bäräñgelär beraz yomşarğançı 10 minut peşeräbez.  Yartılaş peşkän bäräñgelärneñ östenä onlanğan kätlit şarçıqların salabız.  Kästrülneñ qapqaçın qaplap astın qısabız häm aqrın utta yaqınça 15 minut peşeräbez. Peşkän rizıqnıñ östenä kipterelgän tim’yan yäisä bötnek sibep tabınğa çığarabız. Aşlarığız tämle bulsın.