Törek wä tatar dönyasında - 2017
2017nçe yılda “Törek wä tatar dönyasında” tapşıruında yañğırağan qayber yazmalar belän äñgämälärgä qısqaça küzätü
►Törek wä tatar dönyasında - 2017
Sadri Maqsudi ülemeneñ 60 yıllığında İstanbulda iskä alındı
Uzğan 2017nçe yılnıñ 24nçe fevral’ könne tanılğan ğalim häm däwlät êşleklese Sadri Maqsudi ülemeneñ 60 yıllığında İstanbulda iskä alındı.
İstanbul universitetında ütkärelgän fänni cıyında Sadri Maqsudineñ onığı Gölnur Üçok “Fotosürätlärdä ordinar professor Sadri Maqsudi Arsal” isemle slayd-şow täqdim itte. Fänni cıyında berençe dokladnı isä Sadri Maqsudineñ onığı Gönül Pultar yasadı. Sadri Maqsudineñ onığı professor doktor Ali Vahit Turxan da babayı turında mäğlümat birep uzdı.
1917nçe yıldağı İdel-Ural Milli Mäcles häm Milli idarä räise, kürenekle däwlät häm cämäğät êşleklese, fiker iyäse, törki tatar ğalime Sadri Maqsudi Arsalnıñ tormışı häm xezmätläre tanıtılğan fänni cıyında Tatarstannı häm Rusiyä Federaśiyäsen tatar ğalimäse, filologiya fännäre doktorı Älfinä Sibğatullina wäkillek itte.
4nçe Xalıqara Ğabdräşit İbrahim simpoziumı
2017nçe yılnıñ 7nçe mart sişämbe könne Änkara universitetında Tokio mäçete häm qolliyäseneñ 80 yıllığı mönäsäbäte belän ütkärelgän 4nçe Xalıqara Ğabdräşit İbrahim simpoziumı ütkärelde.
2017nçe yılnıñ 7nçe mart sişämbe könne Änkara universitetında Tokio mäçete häm qolliyäseneñ 80 yıllığı mönäsäbäte belän ütkärelgän 4nçe Xalıqara Ğabdräşit İbrahim simpoziumın Änkara universitetı qarşındağı Aziya-Tın okeanı êşçänlege ğamäli häm tikşerenü üzäge häm Törek-yapon êşmäkärläre cämğiyäte oyıştırdı.
Änkarada ütkärelgän 4nçe Xalıqara Ğabdräşit İbrahim simpoziumında Tatarstannı Tatar ênsiklopediyası institutı mödire professor doktor İskändär Ğiläcev häm Şihabetdin Märcäni isemendäge tarix institutı professorı, doktor İldus Zahidullin wäkillek itte.
3nçe Zamança sänğät yärminkäsendä tatarlar
Änkara säwdä palatasınıñ “Congresium” üzägendä 2017nçe yılnıñ 16nçı-19nçı mart könnärendä açıq bulğan 3nçe Zamança sänğät yärminkäsendä tatar xatın-qız rässamnäre dä üz äsärlären täqdim itte.
Dini belemne arttıru kurslarında tatar imamnarı
Törkiyä Cömhüriyäte dönyanıñ törle yaqlarında yäşäwçe din qardäşlärebezgä häm şul isäptän törki xalıqlarğa dini belemnären döres itep öyränü häm dini belemnären arttıru ölkäsendä yärdäm qulın suza. Şuşı cähättän Törkiyä Diyanät êşläre idaräse uzğan 2017nçe yılda da çit illärdä yäşäwçe möselman din ähelläre öçen dini belemne arttıru kursların oyıştırdı.
Bu kurslarda mesxet törekläre häm Rusiyä Federaśiyäsennän möselman din wazıyfalıları, şul isäptän Seber yaqlarınnan tatar imamnarı da qatnaştı.
Törkiyädä Sabantuy cıyınnarı
İyül’ ayınıñ berençe atna axırında Törkiyädä Sabantuylar görläp uzdı. Tatarstan qunaqları da qatnaşqan İstanbul häm İskeşähärdäge cıyınnarda tradiśion yarışlar, bäyge-uyınnar, cır-büyülär oyıştırıldı.
Tatar Kongressı Qorıltayında Törkiyä tatarları
2017nçe yılnıñ 3nçe-6nçı avgust könnärendä Tatarstan başqalası Qazanda ütkärelgän Bötendönya tatar kongressınıñ 6nçı qorıltayında Törkiyädän qatnaşqan Behzat Aqtaş uy-fikerläre belän urtaqlaştı.
100 yıllığında Sovet inqilabı häm törki dönya
2017nçe yılnıñ 25nçe-27nçe üktäbr’ könnärendä Törkiyä başqalası Änkarada urnaşqan Hacättäpä universitetı qarşındağı Törkiyät tikşerenüläre institutında “100 yıllığında Sovet inqilabı häm törki dönya” isemle 6nçı xalıqara Törkiyät tikşerenüläre simpoziumı ütkärelde.
Rusiyä Federaśiyäsennän törle törki xalıqlarnıñ wäkilläre dä qatnaşqan xalıqara fänni cıyında tatarlarnı çığışı belän Tatarstannıñ Qaybıç yaqlarınnan bulğan, bügenge köndä Törkiyäneñ Adıyaman universitetınıñ turizm fakul’tetı dekanı bulıp wazıyfa başqaruçı professor doktor Ramilä Yarullina Yıldırım wäkillek itte.
Tatar-qırğız balerinası Aysılu Tokombayeva belän oçraşu
2017nçe yılnıñ 12nçe noyabr’ yäkşämbe könne Törkiyä başqalası Änkarada urnaşqan “İdiliya” tatar aşları restoranında tanılğan tatar-qırğız balerinası Aysılu Tokombayeva belän oçraşu ütkärelde.
Pol’şa möselman tatarlarınıñ ğoref-ğadätläre häm zamandaşlığı
2017nçe yılnıñ 29nçı noyabr’ çärşämbe könne Törkiyä başqalası Änkaradağı Bilkent universitetınıñ sänğät, dizayn häm miğmarlıq-arxitektura fakul’tetında “Pol’şa möselman tatarlarınıñ ğoref-ğadätläre häm zamandaşlığı” isemle kürgäzmä açıldı.
Pol’şanıñ Törkiyädäge ilçelege oyıştırğan räsem kürgäzmäsen açu aldınnan mini konferenśiya ütkärelde.
Pol’şa tatarlarına bağışlanğan cıyın häm kürgäzmä belän bäyle fikerläre belän urtaqlaşuın sorap, qırım tatar ğalime Haqan Qırımlığa möräcäğät ittek.
Änkarada tatar ğalime Äxmät Timer iskä alındı
Törkiyä başqalası Änkarada ataqlı tatar ğalime Äxmät Timerneñ tuuına 105 yıl tulu mönäsäbäte belän iskä alu kiçäse ütkärelde.
“İdiliya” tatar aşları yortında oyıştırılğan kiçädä tumışı belän Tatarstannıñ Älmät yaqlarınnan bulğan, kürenekle tyurkolog häm mongoloved Äxmät Timerneñ qızı fännär kandidatı Bahşayiş Timer Fıratoğlu ätiseneñ tormışı häm xezmätläre turında kiñ qırlı mäğlümat birep uzdı.
Tikşerenüçelär Roza Qorban hän Ömär Özcan çığış yasağan kiçädä Äxmät Timerneñ berençe şäkertlärennän berse bulğan professor doktor Tuncär Gülänsoy uqıtuçısına qağılışlı xatiräläre belän urtaqlaştı.
Törek wä tatar dönyasında - 2017 (latin) / Kiril variantı tübändäge sıltamada:
Bäyläneşle xäbärlär
19 may - Atatörekne iskä alu, yäş'lär häm sport bäyräme
Bu bäyräm Törkiyä Cömhüriyäte häm Tönyaq Kipr Törek Cömhüriyäteneñ milli bäyrämeder
