Terrorçılıq böten cirdä

Törkiyä Cömhüriyäte İlbaşı Räcäp Tayyip Ärdoğan Könbatış başqalalarınıñ “PKK”, “FETÖ” häm sul terror oyışmaların yaqlawın gel tänqitläde. Ayıruça “DEAŞ” terror oyışması belän köräşneñ başında şaqtıy Könbatış ileneñ küzläw mäğlümaten urtaqlaşuda könçel räweştä xäräkät itüe häm üz watandaşlarınıñ şuşı oyışmağa quşıluın täêmin itkän yullarnı totqarlamawı Törkiyä liderı Ärdoğannı açulandırdı. Häm şul könnän birle Ärdoğan: “Terror dulqını ber könne sezgä dä kiterep bäräçäk”, - dip kisätä.

“DEAŞ” citäkçelek kadrlarınıñ zur küpçelegeneñ Könbatış illäreneñ pasportların yörtüenä qaramastan Törkiyäneñ şul uq waqıtta säwdä, xärbi häm säyäsi ölkädä berlektäşe bulğan bu illär duslarınnan kilgän bu kisätügä iğtibarsız qala. Törkiyä “DEAŞ” belän üz cirlärendä, Süriyä häm Ğiraq (Ğıyraq) belän ber rättän xärbi kiñäşmälär ütkärgän böten illärdä taşlama yasamıyça köräş alıp bara. “DEAŞ” terrorçılığına yözlärçä watandaşın häm ğaskäriyen şähit birde.

Qızğanıç, Törkiyä Könbatış dusları tarafınnan şuşı terrorçılıq belän köräştä ozaq waqıt buyı yalğız qaldırıldı. Bu da citmägän kebek, “DEAŞ”nıñ astırtın versiyası bulğan Xalıqara “Fätullahçı” terror oyışması “FETÖ”nıñ dezinformaśiyası belän ozaq waqıt buyı Törkiyäneñ “DEAŞ”qa qarşı passiv xäräkät itüenä ışandı. Xätta qayçaq Könbatışlı xezmättäşlärebez matbuğatlarında Törkiyäneñ şuşı terror oyışmasına yärdäm itüe turında yalğan xäbärlär yazıp çıqtı.

Könbatış jurnalistları xezmättäşlärebez hönärebezneñ xurlıqlı şuşı xäbärlärne yazğan çaqta “DEAŞ” terror oyışması da Törkiyäneñ toraq urınnarına, zur şähärlärenä bombalar ırğıta ide. Barı tik “FETÖ” terror oyışmasınıñ propaganda berämleklärennän yalğan mäğlümat alıp, yala yağuğa nigezlängän xäbärlär, mäqalälär yazğan häm radioteletapşırular äzerlägän xezmättäşlärebez şuşı terror oyışması ütergän yözlärçä gäyepsez törek tınıç xalqı arqasında vöcdat ğazabın cigä mikän?

Londonda, Parijda, Bryuksel’ häm başqa Könbatış şähärlärenä bu qanlı oyışma höcüm itkän çaqta bez Törkiyälelärneñ yöräkläre sızlıy ide. Törkiyä jurnalistları häm yazuçıları bularaq bu terror ğamällären läğnätläwçe yazular yaza idek häm tapşırular alıp bara ide. Niçä alman, Niderlandlı, Bel’giyalı yäki franśuz xezmättäşebez “DEAŞ”, “FETÖ” yäki “PKK” terrorçıları tınıç xalıqtan küpläp ütergän meñnärçä Törkiyä watandaşı öçen matäm tottı? Yäisä bu küpläp üterülärne tänqitläwçe, rizasızlıq belderüçe yazular yazdımı?

Şunısı da qızıq: unnarça Könbatış xezmättäşemne “PKK”nıñ terrorçı äzerläwçe lagerlarında, “FETÖ” terror oyışması atamanınıñ sarayında yäki üz illärendäge êlemtä byurolarında kürdek şulay uq üz mediaları aşa. Barı tik Könbatış jurnalistları ğına tügel, “NATO”da, Awrupa tamğaxanä berlegendä häm Könbatışqa da zarar birgän terror oyışmalarına qarşı urtaq köräş alıp baruçı illärneñ xökümät häm däwlät başlıqlarınıñ bu terror oyışmasına zur söyü häm saqlawçanlıq kürsätüen küräbez häm yäşibez.

Häm şuşı säyäsmännär törek däwlät räsmiläre belän qul qısışıp, ber ük östäl tiräsendä cıyılğannan soñ bu terrorçılar belän dä yänäşä tora. Bu dualist säyäsätlären alıp barğan çaqta Törkiyä däwlät êşlekleläre belän qara-qarşı oçraşqannan soñ törek tınıç xalıqnı, törek xärbilären häm poliśiyasın ütergän terrorçılar belän oçraşqan öçen ükenü xis itälär mikän?

Misal öçen Germaniyanı qarap uzıyq. Germaniya kanślerı Merkel här awırlıqta Törkiyägä, Törkiyä liderı Ärdoğan yanına kilep yaqlawın ala. Şul uq kanśler Merkel tınıç xalıqtan un meñnärçä keşene, bäbilärne, qartlarnı, tumağan balalarnı, xärbilärne häm poliśiyanı ütergän “PKK” terror oyışmasına xucalıq yasıy. Berlektäşe bulğan Törkiyä İlbaşı Ärdoğannıñ Germaniyada üz watandaşları belän oçraşuında röxsät birmi. Ämmä şul uq waqıtta unmeñnärçä törek ildäşeneñ qatile bulğan “PKK” şäflärenä ileneñ böten şähärlärendä diyärlek miting ütkärügä, cıyıluğa häm propaganda yasawğa röxsät birä.

Xätta uzğan könnärdä Germaniyada ütkärelgän G 20 yuğarı däräcäle oçraşuı ütkärelgän binanıñ berniçä yöz metr aldında yaqınça unmeñnärçä törek watandaşın üterü boyırığın birgän, soñğı yöz yılnıñ  iñ zur terrorçılıq organizatorı häm liderı Abdullah Öcalan räsemeneñ açıluına häm terrorçılıqnı izgeläşterüçe uram cıyınınıñ ütkärelüenä röxsät birde.

Xätta alman küzläw oyışması da äzerlägän xisabında “PKK” terror oyışmasınıñ un millionnarça yevrolıq yärdämen üz illärendä cıyuın belderde.

2016nçı yılnıñ 15nçe iyül’ tönendä 250 törek watandaşın ütergän häm meñnärçäsen yaralağan “FETÖ” terror oyışması äğzase tüntäreleşçe ofiśerlarğa qoçağın açtı. Alarğa komfortlı yäşäw däräcäsen täqdim itte Germaniya.

Häm bügen Germaniya da çäçkänen urıp cıya.

Hamburgta ütkärelgän G 20 sammitın protest sıltawı belän “PKK”lılar, “FETÖ”çılar häm başqa terror oyışmaları şähärneñ här yağın diyärlek tar-mar itte. “AntiFa” dip yörtelgän terror oyışması Süriyädä, Ğiraqta (Ğıyraqta) “DEAŞ” häm “PKK” belän urtaq ğamällär başqarğan bulsa, Germaniya başqalasında däwlät saqlawı astında terror tarata.

Häm Törkiyä Cömhüriyäte liderı Ärdoğannıñ äytkäne kebek, terror dulqını monnan arı Awrupanıñ här urınında. İrtägä Awrupa poliśiyasınıñ bu terrorçılarğa qarşı niçek köräş alıp bara alaçağı zur qızıqsındıru uyata. Häm här cirdä bulğanı kebek bu terrorçılar Awrupadağı tınıç xalıqnıñ cannarına häm milegenä zarar biräçäk.

“AntiFa” äydäp barğan “PKK”, “FETÖ” häm “DEAŞ” terror oyışmaları, qızğanıç, monnan arı Awrupanıñ da çınbarlığı buldı. Köçle teläkläreneñ äsiri bulğan Awrupalı qayber säyäsätçelärneñ bu yalğış totışın Awrupa tınıç xalqı bik awır tüläyäçäk, dip qurqam. İñ borçılırlıq bulğanı da – bu tınıç xalıqnıñ bezneñ kebek terrorçılıq belän yäşärgä mäcbür buluı.

Ärdal Şimşäk