Tanılğan tatar cırçısı Flyora Söläymanova wafat buldı
Ul ozaq waqıtlı awırudan soñ xastaxanädä küzlären mäñgelekkä yoma
Bügen 84 yäşendä Tatarstannıñ xalıq artistı, kürenekle tatar cırçısı Flyora Söläymanova wafat buldı. Anıñ yöräge tönge säğat’lärdä Qazan xastaxanäläreneñ bersendä tibüdän tuqtıy. Bu xaqta Tatar däwlät filarmoniyäseneñ matbuğat xezmäte xäbär itä. Cırçı küp yıllar älege filarmoniyäneñ solistkası ide.
Flyora Söläymanova 1939nçı yılnıñ 10nçı martında Kama Tamağı rayonınıñ İske Barış awılında dön’yağa kilä. 1955nçe yılda ul Qazanğa kilep kiyez itek basu kombinatına êşkä kerä häm şul uq waqıtta kiçke mäktäptä uqıp urta belem ala. Annan Qazannıñ Gor’kiy isemendäge mädäniyat yortında tanılğan kompozitor Sara Sadıykova citäkçelegendäge xalıq xorına yöri başlıy. Näq’ menä ul Flyora Söläymanovağa vokal belän professional räweştä şöğıl’länergä kiñäş itä.
1971nçe yıldan Tatar däwlät filarmoniyäseneñ solistkası bulğan cırçını klassik tatar êstradası çorınıñ iñ tanılğan şäxeslärennän berse dip atıylar häm İlham Şakirov, Älfiyä Afzalova belän ber rätkä quyalar.
Flyora Söläymanova belän xuşlaşu irtägä Qazannıñ Märcani mäçetendä uzaçaq.
