Çanakkalä iñ zur kruiz köymälären qabul itä
Çanakkalä üzägenä bäyle Käpäz cirlegendä urnaşqan portqa yıl axırına qadär 43 zur kruiz qorabı belän 20 meñnän kübräk yulçınıñ kilüe kötelä
Çanakkalä soñğı yıllarda möhim kruiz köymäläreneñ marşrutına kertelgän turizm märkäzenä äylände.
Törle illärdän kilgän çit il qunaqları bigräk tä Troya borınğı qalası, Troya muzeyı häm Assos belän bergä tarixi Gälibolu yarım utrawına bara.
Portqa kilep tuqtağan franśuz bayraqlı 187 metr ozınlığındağı “Club Med-2” köymäse dönyanıñ iñ zur cilkänle yulçı qorabı. 305 yulçı sıydırışlı köymädä 302 yulçı belän 201 keşelek êkipaj bar.
“Club Med-2” qorabınıñ ikençe kapitanı Adrien Gailhac Çanakkaläneñ marşrutlarındağı möhim şähär buluın belderde.
Yulçılarnıñ zur öleşeneñ ayıruça bu urınnı kürergä teläwen citkerüçe Gailhac, Troya häm tarixi Gälibolu yarım utrawın gizep, töbäk tarixı turında tikşerenü ütkärergä teläwen äytte.
“Club Med” şirkäteneñ kruiz säwdä mödire Saida Dridi dä monnan alda individual’ räweştä Çanakkalägä berniçä tapqır kilü mömkinlegen tabuın belderde.
Çanakkaläneñ turizmnıñ barlıq törlärenä iyä siräk şähärlärdän berse buluına iğ’tibarnı yünältüçe Dridi: "Bu turizm qalası. Diñgeze bar, tabiğate bar, min monda bulmağan äyberne kürmädem. Şuña kürä keşelär monda kilep bu urınnı kürergä telilär,” – dip äytte.
“Club Med-2” – Çanakkalägä bıyıl kilgän 16nçı köymä.
Bıyıl Çanakkalä portına tuplam 43 qorab belän 20 meñnän kübräk yulçınıñ kilüe küz aldında totıla.
