Bayden Tina Tyernernıñ ğailäseneñ qayğısın urtaqlaştı

Amerika Quşma Ştatları cırçısı Tina Tyerner 83 yäşendä wafat buldı. Köçle tawışı häm stile belän “Rok-n-roll patşabikäse” dip tä yörtelgän sänğat’çe cırlar yazuı, biyüe häm aktyerlıq säläte belän dä üzenä iğ’tibar cälep itte.

Tyerner 1950nçe yıllarnıñ axırında muzıka dön’yasına kilep kerä häm 2009nçı yılğa qadär säxnädän töşmi. Ul Grêmmidan başlap bik küp büläklärgä iyä buldı häm al’bomnarı dön’ya külämendä 100 millionnan artıq satıldı.

AQŞta tuğan sänğat’çe soñınnan Şveyśariyä watandaşı buldı. Ul Śürih şähärendäge öyendä ozaq waqıtlı xastalıqtan soñ küzlären mäñgelekkä yomdı.

AQŞ ilbaşı Djo Bayden tanılğan cırçı Tina Tyernernıñ ğailäse häm sänğaten söyüçelärneñ qayğısın urtaqlaştı. Ul mäşhür şäxesneñ üleme belän bäyle yazmaça belderü yasadı. Anda ul Tina Tyernernıñ pop, rok häm R&B şikelle törle kategoriyälärdä küp yünäleştä muzıka icat itep 12 Grêmmi büläge aluğa ireşüenä iğ’tibarnı cälep itte.

Bayden cırçınıñ konśertlarına millionnarça keşeneñ ağıluın xäterlätte häm anıñ Amerika muzıkasın üzgärtkän siräk oçrıy torğan talant buluı xaqında äytte.