Mäsut Özil futboldan kitä

Kar’yerasın İstanbulnıñ Medikal Başakşähir klubında däwam itüçe tanılğan törek futbolçısı Mäsut Özil sośial’ mediada yasağan belderüe aşa futboldan kitüen belderde.

34 yäş’lek sportçı bu xaqta tiränten uylanuın häm şundıy qararğa kilüen äytä. Ul yaqınça 17 yıl professional’ futbolçı buluın äytä. “Bu mömkinlek öçen äytep betergesez räxmätlemen. Tik soñğı atnalarda häm aylarda qayber travmalar kiçergännän soñ, futbolnıñ zur säxnäsennän kitü waqıtı citüen tağın da nığraq añladım,”-di Mäsut Özil.

Futbolçı kar’yerasınıñ onıtılmas xatirälär häm kiçereşlär belän tulı iskitkeç yulçılıq buluın citkerä. Ul üze formasın kigän komandalar “Şalke 04”, “Verder Bremen”, “Real Madrid”, “Arsenal”, “Fenerbaxçä” häm “Medipol Başakşähir”däge barlıq iptäşlärenä räxmät äytte.

Mäsut Özil 159 tapqır formasın kigän “Real Madrid” belän liga häm Patşa kubogı çempionı buluğa ireşte, 254 tapqır forma kigän Arsenal belän isä 4 Federaśiyä kuboğın yawladı. Ul Germaniyä cıyılma komandası belän 92 tapqır qırğa çıqtı häm 23 gol kerte, ä Braziliyädä uzğan 2014nçe yılğı Bötendön’ya kubogında çempion buldılar.