Dinozavr aşqazanında imezüçe xaywan tabıldı

Monnan 120 million yıl êlek yäşägän iñ keçkenä dinozavrlardan berse bularaq bilgele mikroraptornıñ aşqazanında imezüçe xaywannıñ qatılaşqan qaldıqları tabıldı.

CNNnıñ xäbärenä qarağanda, açışnı Makgill universitetınıñ biologiyä professorı Xans Larsson yasıy. Ul Qıtayda muzey kollekśiyälären tikşergändä yaqınça 1 metr zurlığındağı mikroraptornıñ aşqazanında başqa ber xaywannıñ ayağın açıqlıy. Larsson anıñ iskitkeç räweştä saqlanuın citkerä. Ul tabıldıqnıñ kimerüçelärgä oxşağan imezüçe törneñ yaqınça 1 santimetr ozınlığındağı ayağı buluın belderde.

Professor mikroraptorlarnıñ balıq, qoş häm kältäsımannar aşawın, ä menä imezüçe xaywan awlawları belän bäyle täwge tapqır konkret dälilgä ireşülären äytte. Küptän yuqqa çıqqan älege dinozavrlarnıñ niçek tuqlanuların kürsätüçe tabıldıqlar siräk oçrıy. Larsson bu açışnıñ êlekkege êkosistema turında yaña qaraş barlıqqa kiterüen äytte.   

Mikroraptor fosili 2000nçe yıllarnıñ başında Qıtaynıñ Lyaonin provinśiyäsendä tabıla. Ul kön yaqtılığına çığarılğan täwge yöntäs dinozavrlardan berse.