Ronaldunıñ atqan tubı tarixqa kerde
Katarda uzuçı FİFA Dön'ya kubogında kiçäge matçlar arasında iñ istä qala torğanı Portugaliyä-Gana oçraşuı ide
1910875
Bıyılğı Dön’ya kubogınıñ ambiśiyäle komandalarınnan berse Portugaliyä cıyılması H törkemendäge berençe matçında Gananı 3kä 2 ciñde. Ä Ronaldunıñ atqan tubı tarixqa kerde. Portugaliyäle futbol yoldızı 5 ayırım Dön’ya kubogında gol kertkän berençe futbolçı.
Oçraşunıñ berençe yartısı 0gä 0 tämamlandı, ikençe yartıda qapqalar 5 tapqır “cillände”. Berençe tupnı Ronaldu penaltidan kertte. Şunnan soñ ber-ber artlı gollar kilä başladı. Matç soñğı sekundına qadär dulqınlandırğıç buldı. Näticädä Portugaliyä cıyılması Gananı 3kä 2 ciñde.
Tağın ber qızıqlı mizgel, Ronaldu gol kertkännäñ soñ söyengän waqıtta artındağı pannoda Messineñ räseme kürende. Şulay itep älege ike yoldız arasındağı köndäşlek tağın ber qat assızıqlandı.
