Baqıda "Teknofest Azärbaycan" tanıtıldı

Festivalneñ tanıtu cıyılışında çığış yasawçı Azärbaycan sanlı üseş häm transport ministrı Räşat Näbiyev “TEKNOFEST”neñ Azärbaycanda oyıştırıluınıñ üzläre öçen zur däräcä häm cawaplılıq buluına basım yasadı.

“TEKNOFEST”neñ Azärbaycan yäş’läreneñ belemgä, texnologiyalarğa häm innovaśiyälärgä qızıqsınuın arttıraçaq çara bulaçağın iskärtep uzuçı Näbiyev Azärbaycan yäş’lären, “start-up”larnı (êşmäkärlärne) häm bäyläneşle şirkätlärne festival’dä qatnaşırğa çaqırdı.

“Baykar” texnologiya liderı Sälçuk Bayraqtar da “TEKNOFEST”neñ xıyal belän başlawın häm törek milläte urtaq bulğan mobilizaśiya belän 5nçe yılına kilep citüen äytte.

“TEKNOFEST” mobilizaśiyasınıñ törek millätenän zur xuplaw aluın, 2nçe yılında 1 million 700 meñ keşeneñ qatnaşuı belän dönyanıñ iñ zur aviaśiya, ğaläm häm yuğarı texnologiyalar festivale buluın belderüçe Bayraqtar bıyıl Törkiyädä festivalne Qara diñgez töbägeneñ Samsun qalasında uzdıraçaqların, azärbaycannarnı “TEKNOFEST Qara diñgez”gä dä çaqıruın äytte.

Sälçuk Bayraqtar “TEKNOFEST”neñ könnän-kön üsä baruın häm üsärgä däwam itüen, çit ildän citdi xezmättäşlek täq’dimnären aluların añlattı.

Bäysezlek öçen milli saqlanu sänäğätenä iyä bulunıñ zarurlığına iğ’tibarnı yünältüçe Bayraqtar monıñ iñ yaxşı ürnägen milli häm original’ bularaq qamilläşterelgän “Bayraqtar” keşesez qorallı hawa apparatları wazıyfa başqarğan Törkiyäneñ terrorçılıq belän köräş xäräkätendä häm ärmän yawınnan azat itelgän Qarabaxta kürülären xäterlätte.