"Törkiyä dron festivale"ndä tawış birü tögällände

Böten dön’yada tanılğan 12 professional FPV dron pilotları Törkiyäneñ matur urınnarın töşerep yörgän ide. Alarnıñ êşlären bäyäläwdä xätta ilbaşı kabinetı äğ’zaları da qatnaştı. “Törkiyä dron festivale”ndäge foto häm videolar öçen tawış birü kiçä tögällände.

Ğailä häm sośial’ xezmätlär ministrı Där’ya Yanık sośial’ media akkauntında bolay dip yazdı: “Törkiyäneñ 12 şähärendäge tarixi häm mädäni miras bu qadär matur itep töşerelä ala. Törkiyä dron festivalendäge tawış birüdä min Cumhur Büyüktaş töşergän Mardin küreneşlärenä östenlek birdem”.

Milli mäğarif ministrı Mäxmüt Özär isä “Tarix” kategoriyäsendä Burak Altıparmaknıñ - Adıyaman, “Işanu” kategoriyäsendä Cumhur Büyüktaşnıñ - Mardin, “Su” kategoriyäsendä Serxio Êrnandes Lopesnıñ - Antaliyä häm “Sälamätlek” kategoriyäsendä Vladimir Metiv’yernıñ Sivas videoları öçen tawış birgän.  

Mädäniyät häm turizm ministrı Mäxmät Nuri Ärsoy da sośial’ mediada “Törkiyä dron festivale”ndä tawış birüdä qatnaşuın belderde häm dron pilotlarına uñışlar teläde.

İlbaşınıñ cämäğat’çelek belän êlemtä bülege citäkçese Fäxretdin Altun sośial’ mediada “Ber-bersennän matur küreneşlär arasınnan min Mardinğa östenlek birdem” dip yazdı.

Tawış birüdä Törkiyä radiotelevideniyese ğomum mödire Zahid Sobacı häm Anadolu agentlığı citäkçese Serdar Karagöz dä qatnaştı.

Festival’ qısalarında 12 professional’ FPV dron pilotı İstanbul, İzmir, Antaliya, Adiyaman, Denizli, Xatay, Mardin, Muğla, Nevşehir, Sivas, Şanlıurfa häm Vanda tarixi, mädäni häm tabiğıy maturlıqlarnı üzençälekle urınnardan häm rakurslardan töşerde. Soñınnan alar xalıqnıñ tawış birüenä täq’dim itelde. Älege êşlär quyılğan turkdronefest.com säxifäsen dön’ya külämendä 3 million keşe kerep qaradı häm 380 meñ keşe tawış birüdä qatnaştı.