"Xörräm soltan" satıldı
Londonda uzğan aukśionda Kanuni soltan Söläymannıñ ğailä äğ'zalarınıñ portretları satuğa çığarıldı
Angliyäneñ aukśion yortı Sotebis Ğosmanlı padişahı Kanuni Soltan Söläymannıñ xatını Xörräm soltannıñ portretın 126 meñ sterlingqa sattı.
Çara Londonda oyıştırıldı. “İslam dön’yası häm Hindstan sänğat’läre” iseme astında uzğan aukśionda meñ’yıllıq tarixi ob’yektlar, räsemnär häm qul’yazular satuğa çığarıldı. Alar arasında 13nçe ğasırdan qalğan metal êşlänmälär, 2 par almaz häm zöbärcät Babur küzlege, altınlanğan Kor’än-i Kärim, astronomiya cihazları, İran miniatyuraları bar.
Aukśionda Törkiyädän İznik keramik äsärläre dä urın ala. Veneśiyalı rässam Titian tarafınnan 16nçı ğasır axırı - 17nçe ğasır başında yasaluı uylanıluçı Xörräm soltan portretı isä iñ kürenekle äsärlärdän. Anıñ başlanğıç bäyäse 70 meñ sterling ide. Räsem aukśionda, komissiyä bäyäsen dä kertep, 126 meñ sterlingqa satıldı.
Kanuni Soltan Söläymannıñ qızı Mixrimax soltannıñ ike portretınnan berse 13 meñ 860 sterlingqa, ikençese 17 meñ 600 sterlingqa kitte. Padişahnıñ üzeneñ portretına 11 meñ 340 sterling birdelär.
