Mäsut Özil İstanbulda

“Fenerbahçe” futbol klubı tarafdarları tüzemsezlek belän kötkän Mäsut Özil, nihayät’, İstanbulda. Törek millätennän bulğan Germaniyä futbolçısın utırtqan şäxsi oçqıç Atatörek aêroportına töşep utırdı. Ul Angliyädän ğailäse belän bergä kilde. Aêroportta Özilne klub wäqalätleläre qarşıladı.

“Fenerbahçe” tanılğan futbolçınıñ transferı öçen söyläşülär başlanuın beldergän ide. Özil jurnalistlarğa bolay dide: “Bik dulqınlanam. Çönki min härwaqıt “Fenerbahçe”le idem. Barı “Fenerbahçe” öçen genä tügel, minem öçen dä töşlär çınğa aşa. Formanı kiyüne kötäm, komandadağı iptäşlär belän, inşallah, uñışlı bulırbız. Dulqınlanudan başqa berni äytä almıym. Barısı da yaxşı bulır, xäyerlese”.