Betxovennıñ äsären yasalma zihen yaza
Kompozitornıñ tögällänmägän 10nçı simfoniyäsen tulısınça tıñlaw mömkin bulaçaq
Klassik muzıka tarixınıñ iñ tanılğan kompozitorlarınnan berse Lyudvig van Betxovennıñ tögällänmiçä qalğan 10nçı simfoniyäsen yasalma aqıl yazıp beteräçäk.
“Doyç Velle” gazetınıñ xäbärenä qarağanda, muzıka belgeçläre, kompozitorlar, komp’yuter programmaçıları häm pianist Robert Levin kergän xalıqara törkem älege äsärne tämamlaw öçen cıyılışa.
Tögällängän 10nçı simfoniyäne Betxoven tuğan şähär Bonnda 2020nçe yılnıñ 28nçe aprelendä işetergä mömkin bulaçaq.
Tanılğan kompozitor 1827nçe yılda simfoniyäsen yazıp betermiçä ülep kitä. Betxovennıñ älege äsär belän bäyle qaralamaları häm qayber notaları ğına qala.
Xalıqara belgeçlärdän toruçı törkem Betxovennıñ başqa äsärlärenä nigezlänep algoritm xäzerläde. Proyekt öçen uylap çığarılğan yasalma zihen anı qullanıp10nçı simfoniyäneñ citmägän öleşlären tämamlaw öçen êşçänlek başladı.
Yartılaş qalğan köylärne komp’yuter programması belän yazıp beterergä kereşü berençe tapqır ğına yasalmıy. Monnan alda, Qıtaynıñ telekommunikaśyälär gigantı Xuaveynıñ ber proyektı qısalarında, Avstriyä kompozitorı Franś Şubertnıñ yartılaş qalğan 8nçe cimfoniyäsen yasalma zihen tamamladı.
