Göbäklitäpäne tanıtu
İñ täwge cirläşü urınnarınıñ bersenä kilüçe sanı arta
Şanlıurfadağı Göbäklitäpä Törkiyäne tanıtu ob’yektlarınnan berse bulaçaq. Cirlek YuNESKOnıñ Bötendön’ya mirası isemlegendä. Ul tarixta bilgele täwge cirläşü mäydannarınnan berse.
Törkiyä mädäniyät häm turizm ministrı Mähmät Nuri Ärsoy İstanbulda start alıp Şanlıurfağa barıp citkän “Könçığış-Könbatış duslıq häm solıx ralliye” törkeme belän oçraştı. Çara 2019nçı yılnı Göbäklitäpä yılı bularaq iğ’lan itelüe uñayınnan uzdırıla.
Ministr sportçılar belän oçraşıp söyläşkännän soñ ralli maşinasınıñ yörtüçe känäfiyenä utırdı. Turda qatnaşuçılar belän ul şähärne äylände häm Göbäklitäpägä yul aldı. Alar tarixi cirlektä gizep, êkskursovodnıñ mäğ’lümatın tıñladı.
Ärsoy äytüençä, Göbäklitäpäne tanıtu öçen dön’yanıñ här tarafında reklama kampaniyäläre alıp barıla. “Könçığış-Könbatış duslıq häm solıx ralliye” dä bu nisbättän bik ähämiyätle.
Ministr bıyıl çit illärdä alıp barılğan êşçänlekläreneñ näticälären dä söyläde: “Ayıruça ğıynvar ayınnan başlap çirat belän Germaniyä, Rusiyä, Angliyädä televideniye, jurnal häm śifrlı öslektä bik nıq tanıtu ütkäräbez. Aprel’ ayı kürsätkeçlären tikşerdem - keşe sanında 24% artu bar. Üseş buyınça berençelek Germaniyädä - 48%, ikençedä - 34% belän Rusiyä, öçençedä -31% artu belän Angliyä. Bolar ğıynvar ayınnan birle bik nıqlı tanıtu uzdırılğan illär. Dimäk ki, näticäse bar”.
