Pablo Êskobar muzeye yabıldı

Kolumbiyada 1993nçe yılda üterelgän narkomafiya baronı Pablo Êmilio Êskobar Gaviriyanıñ muzey-yortın yaptılar. Anın qağıydälärgä turı kilmäwen säbäp itep kürsätälär.

Êskobarnıñ cinayät’ tulı tormışı bik küp fil’m häm serialğa material buldı. Muzeynı isä Medellin şähärendä anıñ “ayuqay” quşamatlı ênese Roberto Êskobar açqan ide. “Mädäniyät uçağı”n şähär xakimiyäte häm Kolumbiya turizm ministrlığı yaptırdı.

Cirle gazeta xäbärlärendä yazılğança, şähärneñ iminlek särqatibe Andres Tobon älege muzeynıñ Medelligä bik küp zarar kitergän banditnıñ tormışın dahiläşterüdän tış qağıydälärgä dä turı kilmäwen beldergän.  

Yort Kolumbiyädä çit il turistlarına Êskobar belän bäyle urınnarnı kürsätep yörüçe “Narko-tur” tuqtalışlarınnan berse bularaq bilgele. Anda baronnıñ qayber şäxsi äyberläre häm küpsanlı fotoları kürgäzmägä quyılğan. Muzeynı turizm belän bäyle bik küp internet säxifälärendä oçratırğa mömkin.

Êskobar 1949nçı yılda Rionegro şähärendä dön’yağa kilä. Cinayät’ yulın ul qaraqlıqtan başlıy häm dön’yadağı iñ zur narkotik baronnarınıñ bersenä äwerelä. Bandit rişwät, yanaw häm cinayät’lär belän Kolumbiyäneñ här cirendä zur köçkä iyä bula. Xätta säyäsätkä kerep parlamentta da urın alğan ide.

Pablo Êskobarnı 1993nçe yılda iminlek köçläre oyıştırğan operaśiyä waqıtında Medellin şähärendä üterälär.