Tarixi munçanı böten kileş küçerdelär

Batmannıñ Xäsänkäyf ilçäsendäge 1 meñ 500 tonna awırlığındağı Artuklu xamamı (törek munçası) başqa urınğa küçerelde. Ul xäzer şähärneñ yaña mädäni park mäydanında. İske urınında Ilısu böyäse häm gidroêlektr stanśiyäse proyektı tormışqa aşırılaçaq.

Batman vilayäte başlığı Äxmät Däniz beldergänçä, tarixi äsärne küçerü êşläre dön’yağa ürnäk bulırlıq itep başqarıldı. Ul arxitektura häykällären böyä külennän çığarunıñ däwam itäçägen äytte.  “Monnan tış tağın 6 äsär küçereläçäk. Xäsänkäyf çınlap ta tarixi yözen saqlayaçaq,”-dide Äxmät Däniz.

Artuklu xamamı 1200nçe yıllarda tözelgän. Anı böten kileş küçerdelär. Bu êş 6 säğat’ 40 minut däwam itte.

Aña qadär böten kileş küçerelgän iñ borınğı qorılma - 540 yıllıq Zäynäl Bäy törbäse ide. 1200 tonnalıq äsärne 2017nçe yılnıñ 12nçe mayında taşıdılar.