AQŞ studentlarınıñ protestları däwam itä

Amerika Quşma Ştatlarınıñ N’yu-York şähärendäge Kolumbiya universitetında Fälästin yaqlı ber törkem student tön urtasında kampustağı Gamil’ton Xoll binasına kerde.

Bilgele bulğança, Ğazzägä teläktäşlek yözennän qorılğan lager’ mäydanın buşatmağan studentlarğa disśiplina häm uqudan yıraqlaştıru cäzası birelde. Universitet idaräse belän söyläşülärdä kileşügä bara almağannan soñ studentlar Gamil’ton Xollnıñ töp işegen yaptı häm “Bäysez Fälästin” şiğar’läre qıçqırdı.

Aprel’ ayı urtalarında Kolumbiya universitetında Fälästin yaqlı studentlar uqu yortınıñ İzrailneñ basıp aluına häm Ğazzädäge genośidqa teläktäşlek kürsätüçe şirkätlärgä finans kertemnären däwam itüenä protest belderep kampus baqçasında utıru çarası başladı.

Rektorat çaralarnıñ ikençe könendä N’yu-York poliśiyäsenä möräcäğat’ itep studentlarnı taratırğa bulışuın soradı. Ul çaqta 108 tiräse student saq astına alındı.

Kolumbiya universitetındağı waqıyğa AQŞtağı yuğarı uqu yortlarında fälästinle studentlarğa qarata süz iregen qısrıqlaw bäxäslären qabat kön üzägenä çığardı. Qulğa alularğa rizasızlıq yözennän il külämendä student protestları başlandı. AQŞta 50dän artıq zur universitetta Fälästingä teläktäşlek çaraları däwam itä. Poliśiyä axırğı 2 atnada meñnän artıq student häm uqıtuçını saq astına aldı.