AQŞta tağın beräw üz-üzenä ut törtte

N’yu-Yorkta AQŞnıñ êlşekkege ilbaşı Donal’d Trampnıñ utırışları uzuçı mäxkämäneñ qarşında ber keşe üz-üzen yandırdı. Waqıyğa bina yanında telekanallar turıdan-turı translyaśiyälären alıp barğan waqıtta bula. Şuña kürä älege keşeneñ üz-üzen yandıru mizgelläre êkrannarğa çağıla. Ul tirädä bulğan poliśiyä xezmätkärläre anıñ gäwdäsen çolğap alğan yalqınnı sünderergä tırışa. Xastaxanägä salınğan keşeneñ xäle kritik buluı citkerelde.  

N’yu-York poliśiyäse älege waqıyğa uñayınnan belderü yasadı. Üz-üzen yandırğan keşeneñ Florida ştatınnan 37 yäş’lek Maks Azzarello isemle keşe buluı, anıñ berniçä kön êlek şähärgä kilüe açıqlanğan.

Poliśiyä şäxesneñ waqıyğadan alda yanında listovka yörtüen häm qayber “süz quyışu teoriyäläre” turındağı belderüen internet säxifäsendä dä urtaqlaşuın citkerä. Anda bolay diyelä: “Minem isemem Maks Azzarello, Trampnıñ Manxêttenda utırışı uzuçı urında üz-üzen yandırğan tikşerenüçe. Bu êkstremal’ ğamälem - ähämiyätle ber temağa iğ’tibar cälep itüe öçen yasalğan protest: üz idaräbez bezgä apokalistik faşist dön’ya tüntäreleşe belän bärergä cıyına”.

Şäxesneñ kiçä dä mäxkämä binası qarşına baruı belderelä. N’yu-York poliśiyäse waqıyğanı tikşerü êşe başladı.