Äfğanstanda su basularda ülüçelär arttı

Äfğanstannıñ zur öleşendä täêsirle bulğan köçle yawım-töşemnär kiterep çığarğan su basularda ğomere özelüçelärneñ sanı 70kä, yaralanuçılar isä 56ğa citte. Ğadättän tış xällär oyışması süzçese Janana Sayıq beldergänçä, afättä 2 meñ 500dän artıq öy cimerelde yäisä zarar kürde, 2 meñnän artıq xaywan ülde, meñnärçä gektar basu-qırlar su astında qaldı.

Meteorologiyä xezmäte tağın dürt kön köçle yañğırlar kötelüe turında kisätte.

Äfğanstanda qış aylarında yawğan qarnıñ könnär cılınu belän êrüe, köçle yañğırlar häm asqormanıñ moña äzer bulmawı näticäsendä barlıqqa kilgän su basular här yıl yözlärçä keşeneñ ğomere özelügä säbäpçe bula.