Fälästinneñ BMOda tulı äğ’zalığı tawışqa quyılaçaq
Qararnıñ irtägä 18nçe aprel’dä BMO İminlek şurasınıñ Fälästin cıyılışında qaraluı kötelä
Berläşkän Millätlär oyışmasınıñ İminlek şurasında Fälästinneñ BMOğa tulı äğ’za bularaq qabul itelüe turında qarar ölgese tawışqa qıyulaçaq. Anı Ğaräp törkeme isemennän Aljir äzerli.
Qararnıñ irtägä 18nçe aprel’dä BMO İminlek şurasınıñ ministrlar qatnaşında uzaçaq Fälästin cıyılışında tawışqa quyıluı kötelä. Tik Amerika Quşma Ştatları inde başınnan uq veto signalın birde.
AQŞnıñ BMOdağı daimi wäkile urınbasarı Robert Vud: “Fälästinneñ tulı äğ’zalığı mäs’äläseneñ İzrail belän fälästinlelär arasında söyläşenergä tiyeşle buluın uylıybız,”-dide.
Qararnıñ qabul itelüe öçen 15 äğ’zalı BMO İminlek şurasındağı 5 daimi äğ’zanıñ hiçberseneñ veto qullanmawı häm dokumentnıñ 9 yaqlaw tawışı aluı zaruri. Biredä raslanğannan soñ ul BMO ğomum şurasına kertelä. Anda isä uzu öçen 193 äğ’zanıñ 3tän 2seneñ tawışın aluı kiräk.
Fälästin 2011nçe yılda BMOğa tulı äğ’zalıq öçen möräcäğat’ itte, tik ul BMO İminlek şurasında kiräkle yaqlawnı tapmadı. 2012nçe yılda il “küzätüçe” statusı aldı.
Fälästinneñ BMOdağı daimi wäkile Riyad Mansur 2nçe aprel’dä yasağan belderüendä BMO ğomum särqatibe Antonio Guterrişqa ber xat cibärep qabat äğ’zalıq möräcäğateneñ qaraluın sorawın äytte. Guterriş 3nçe aprel’dä BMO İminlek şurasın älege mäs’äläne kön tärtibenä quyarğa çaqırdı.
