Ukraina suğışında ülgän tınıç xalıq
Rusiyä höcümnärendä hälaq bulğan grajdanlılarnıñ sanı 10 meñ 703kä citte
Berläşkän Millätlär oyışması Rusiyä-Ukraina suğışında üterelgän grajdanlılarnıñ sanınıñ 10 meñ 703kä citüen belderde. İminlek şurasında älege qaynar noqta belän bäyle soñğı wäzğıyät’ qaraldı. Anda BMO ğomum särqatibeneñ Yaqın Könçığış, Aziyä häm Tın okean regionı öçen cawaplı urınbasarı Möxämmät Xälit Xiari çığış yasadı.
“Rusiyäneñ Ukrainanı basıp aluı 10 meñ 703 grajdanlınıñ ülemenä säbäpçe buldı. Alarnıñ 549ı bala. 20 meñ 146 keşe yaralandı. Grajdanlılarğa häm tınıç tormış asqormasına qarata barlıq höcümnärne ğayeplibez”,-dide ul.
BMOnıñ gumanitar êşlär koordinaśiyä xezmätennän wäqalätle Liza Dauten yärdämnär iltüdä äle haman bik zur kirtälär belän oçraşuların äytte. Bigräk tä Rusiyä annekśiyälägän Doneśk, Lugansk, Xerson häm Zaporoj’ye töbäklärenä barıp ireşä almıylar. Anda yaqınça million yarım keşe gumanitar yärdämgä moxtac.