Ärmänstan Rusiyä saqçıların kire cibärä
Ärmänstan citäkçelege başqala Yerivanda urnaşqan Zvartnoś (Звартноц) xalıqara hawa mäydanındağı Rusiyä çik buyı saqçılarınıñ wazıyfaların tuqtatu qararın qabul itte
Ärmänstannıñ “Armenpress” xäbär agentlığı citkergänçä, Milli İminlek Şurası särqatibe Armen Grigoryan Milli Mäclestä ütkärelgän cıyılıştan soñ matbuğat wäkillärenä belderü yasadı.
Grigoryan, Ärmänstan citäkçelegeneñ şuşı aêroporttağı böten xezmätlärneñ tulısınça Ärmänstan wazıyfalıları tarafınnan başqarıluı qararına kilüen belderep: "Ärmänstannıñ bu mäs’älädä anıq totışı bar häm şuşı açıq qaraşın räsmi yazu belän Rusiyä Federaśiyäsenä belderde. Ärmänstannıñ poziśiyäse - Zvartnoś (Звартноц) xalıqara aêroportındağı xezmätneñ Ärmänstan çik buyı saqçıları berlekläre tarafınnan başqarıluı yünäleşendä”, - dip äytte.
Milli Mäcles başlığı Alen Simonyan 27nçe fevral’dä Rusiyä çik buyı saqçılarınıñ Zvartnoś hawa mäydanınnan çığarıluınıñ döres bulaçağın uylawın beldergän ide.
Rusiyä İlbaşı idaräse süzçese Dmitriy Peskov isä Ärmänstan xökümäteneñ şuşı qararı belän bäyle bularaq älegä bernindi mäğ’lümatneñ kilep citmäwen äytkän ide.
Bäyläneşle xäbärlär
Putin Ciñü könendä çığış yasadı
Bügen Rusiyädä İkençe Bötendön’ya suğışınıñ tögällänüen bilgeläp uzalar
