İzrailneñ Ğazzä sızığına höcümnäre däwam itä

İzrailneñ 7nçe oktyabr’dän birle Ğazzä sızığına däwam itkän höcümnärendä 28 meň 473 fälästinleneñ ğomere özelgän, 68 meñnän artıq keşe yaralanğan.

Fälästinneñ räsmi mäğ’lümat agentlığı “WAFA” xäbärenä qarağanda, İzrailneñ Ğazzä sızığına höcümnäre 130 nçı könendä dä däwam itkän.

Sälamätlek saqlaw çığanaqları beldergänçä, Ğazzäneñ üzäk öleşendäge “Nusäyrat” qaçaqlar lagerına xärbi oçqıçlar belän höcüm yasalğan, höcümdä 5 keşe ülgän, yaralanuçılar da bar.

Ğazzäneñ kön’yağındağı Räfax şähäreneñ Äl-Bärazil mäxälläsenä oyıştırılğan hawa höcümendä 1 bala can birgän, 4 keşe cäräxätlängän.

Xan Yunıs şähäreneñ könçığış häm könbatış öleşlärendä dä artilleriya höcümnäre bulğan.

Xan Yunıstağı “Nasır” xastaxanäsendä êlektr tulısınça özelgän.

Ğazzä sızığı üzägendäge “Äl Mägazi” qaçaqlar lagerı  bombalanğan häm anda yaralanuçılar buluı belderelä.