Trampnıñ belderüläre NATO häm Awrupa Berlegen yarsıttı
ÂQŞnıñ êlekkege liderınıñ NATOnıñ iminlegen qaqşatuı turında süzlär äytelde
NATO ğomum särqatibe Yens Stoltenberg êlekkege AQŞ ilbaşı Donal’d Trampnıñ finans yöklämälären cirenä citkermägän berlektäşlärgä Rusiyä höcüm yasasa da, monı kirtälämäw kiräklegen äytüenä reakśiyä belderde. Ul Norvegiyäneñ TV2 kanalına interv’yusında bolay dide: “Berlektäşlärneñ ber-bersen yaqlamayaçağı belän bäyle teläsä-nindi kiñäş iminlegebezgä zarar biräçäk. İlbaşı saylawında kem genä ciñsä dä, AQŞnıñ NATOda köçle häm tuğ’rı berlektäş bularaq qaluın kötäm”.
Awrupa Berlege şurası räise Çarl’z Mişel’ sośial’ media aşa urtaqlaşqan yazmasında: “NATOnıñ iminlege häm 5nçe maddä yärdämläşüe mäs’äläsendä mäğ’näsez belderülär barı Putinnıñ mänfäğatendä”- dide. Ul mondıy süzlärneñ Awrupa Berlegenä üz strategik avtonomiyäsen aşığıç räweştä üsterüe, saqlanuğa investiśiyälär kertüe kiräklege yullamasın birüen äytte.
Donal’d Tramp AQŞnıñ Kön’yaq Karolina ştatında yasağan çığışında ilbaşı bulğan çorda (2017-2021) NATOdağı finans yöklämälären cirenä citkermägän berlektäşlärgä qarata Rusiyä höcümenä qarşı çıqmaw belän yanawın söyläde.
