Ukrainada ilbaşın saylaw kiçekterelde

Ukrainada ilbaşı saylawları kiçekterelde. Sişämbe könne uzğan utırışta il parlamentı - Verxovnaya Rada - däwlät başlığı Volodimir Zelenskiynıñ xärbi xäl waqıtın ozaytu qararın rasladı. Ul 2022nçe yılnıñ 24nçe fevralendä Rusiyä bärep kergännän soñ iğ’lan itelgän ide. Rejimnı ozaytunı Radanıñ barlıq wäkilläre, yäğ’ni 335 deputat ta yaqladı. Xärbi xäl 2024nçe yılnıñ 13nçe mayına qadär däwam itäçäk, mobilizaśiyä waqıtı da ozaytılaçaq.  

Xärbi xälneñ däwam itüe, şul uq waqıtta, ildä mart ayında uzarğa tiyeş saylawlarnıñ da kiçekterelüen añlata. Volodimir Zelenskiynıñ 5 yıllıq idarä çorı mayda tula. Xärbi xäl arqasında ul avtomat räweştä ozaytıla. Qanunnar nigezendä, saylawlar barı xärbi xäl tögällängännän soñ ğına ütkärelä ala.

Kiläse atnada çärşämbe könne Ukraina parlamentınıñ cämäğat’çelektä köçle bäxäslär uyatqan mobilizaśiya qanun ölgesen ber utırışta qarawı kötelä. Ul suğışqa alu kriteriyların tärtipkä sala, xärbi xezmätkä çaqıru dokumentın sanğa suqmawçılarğa qarata çaralarnı qatğıylaştıra.