Ülemnär arta, mäktäptä dä mäyetlär tabılğan

 İzrailneñ 7nçe oktyabr’dän birle Ğazzä sızığına däwam itkän höcümnärendä ğomere özelgän fälästinlelärneň sanı 26 meň 900 gä citkän.

Ğazzädäge Fälästin sälamätlek saqlaw ministrlığı süzçese  Äşräf äl-Kudra 117 kön barğan höcümnär  belän bäyle mäğ’lümatlar citkerde.

Soñğı täwlektä İzrail höcümnärendä 150 fälästinle üterelgän häm 313e cäräxätlängän, şulay itep Ğazzä sızığına däwam itkän höcümnärdä ğomeren yuğaltqan fälästinlelärneň sanı 26 meň 900 bulğan, 65 meň 949 keşe yaralanğan.

Süzçe bilgeläp uzğança, cimereklär astında häm yul çitlärendä äle dä ülelär bar, İzrail köçläreneň totqarlawları arqasında aşığıç yärdäm häm grajdannar saqlanu törkemnäre cimereklär astındağı keşelärgä barıp citä almıy.

Ğazzä sızığınıň tön’yağındağı Bäyt Laxiyädä İzrail tarafınnan qamalışta totılğan mäktäptä qulları häm küzläre bäylängän 30 keşeneň mäyete tabılğan.

Fälästin äsirlär cämğıyäte bu xälne “Mäyetlär İzrailneň bu keşelärne älege cirlektä üterüeneň açıq dälile” dip bäyälägän.   

Bötendön’ya sälamätlek saqlaw oyışmasınıň Global’ ğadättän tış xällär direktorı Mayk Rayn Ğazzädä keşelär açlıqtan ülä häm alar çarasız, bik awır xäldä dip belderä.