Ğazzädä 45 meñ awırlı xatın-qızğa ülem yanıy

Ğazzädä här kön 180 xatın-qız İzrailneñ höcümnäre häm basıp aluı säbäple “qurqınıç” häm “keşeleksez” şartlarda bala tudıra. Bu xaqta Fälästinneñ “Qızılay” cämğıyäte belderä. “X” sośial’ media platformasındağı yazmada äytelgänçä, İzrail köçläreneñ aşığıç yärdäm maşinalarına irek birmäwe näticäsendä bala tudıruçı xatın-qızlarnıñ şaqtıyı xastaxanägä bara almıy.

BMOnıñ xalıq sanı fondı Fälästin wäkile Dominik Allen Ğazzädä soñğı 100 köndä yaqınça 18 meñ xatın-qıznıñ bala tudıruın häm oyışmanıñ alarnı citärlek material belän täêmin itä almawın, xastaxanälärdäge wäzğıyät’neñ bik naçar buluın belderde. Ul kiläse aylarda tağın 5 meñ 500 xatın-qıznıñ bala tabuı kötelüen dä äytä.  

“Susızlıq, azıq-tölek qıtlığı häm mediśina yärdäme citmäw belän oçraşalar. Bombalar, açlıq yäisä susız qalu alarnı ütermäsä, bala tudıru üterergä mömkin. Moña yul quymasqa kiräk”,-di Dominik Allen.

Ğazzädä 45 meñ awırlı häm 68 meñ imezüçe xatın-qız ülem yanawı astında.