Urlanğan törmä saqçıları qotqarıldı

Kön’yaq Amerikadağı däwlät Êkvadorda 7 törmädä çıqqan fetnälär näticäsendä totıq itep alınğan saqçılar qotqarıldı. Däwlät başlığı Daniêl’ Noboa bu xaqta sośial’ media aşa belderde. Ul iminlek xezmätkärlären yaxşı êş başqaruları belän täbrik itte.

İsegezgä töşeräbez, oyışqan cinayät’çel törkem äğ’zaları Êkvadornıñ 7 törmäsendä 8nçe ğıynvarda fetnä kiterep çığardı häm 178 saqçını totıq itep aldı.

Bandanıñ “Fito” quşamatlı liderı Adol’fo Masias Salasar belän berniçä xökemleneñ bu fetnälär waqıtında törmälärdän qaçuı belderelä.

Êkvador xökümäte küpmeder waqıttan birle il külämendä iminlek krizisı belän köräşä. Mäxkümnärneñ törmädän qaçuı häm poliśiyä maşinalarına bombalı höcümnär yasawınnan soñ 9nçı ğıynvarda 60 könlek ğadättän tış xäl iğ’lan itelde. Älege qarar çığarıluğa cinayät’çel törkemnär bik küp poliśiyä xezmätkären urladı häm maşinalarğa ut törtte.

Sośial’ mediada banda äğ’zaları urlağan poliśiyä xezmätkärläreneñ başlarına mıştıq köpşäse terälgän videolar kürende. Alar anda däwlät başlığı Daniêl’ Noboadan yärdäm sorıy.