"Ğazzäneñ yazmışın bilgeläw İzrailgä qalmağan"

Franśiyä tışqı êşlär ministrı Katrin Kolonna Fälästin cire bulğan Ğazzäneñ kiläçägen bilgeläwneñ İzrailgä qalmawın belderde. Ul CNN kanalına interv’yusında xalıqara xoquq prinśiplarına kire qaytırğa çaqırdı.

Kolonna İzrail säyäsätçeläre häm wäqalätleläreneñ sonğı könnärdä Ğazzä sızığındağı fälästinlelärne küçenergä mäcbür itü turındağı ber-ber artlı yasağan belderülären “cawapsızlıq” dip bäyäläde häm bu tördäge söylämnärneñ yaqlarnı çişeleştän yıraqlaştıruın belderde. “Ğazzä kiläçäktäge Fälästin däwläteneñ ber öleşe bulırğa teli. Tormışqa aşırılırday berdänber çara bulğan ike däwlätle çişeleşne yaqlıybız,”-dide ministr.

Germaniyä tışqı êşlär ministrı Annalena Berbok ta Ğazzädäge keşelärne mäcbüri küçerügä qarşı buluların äytte. Ul Lyuksemburg tışqı êşlär ministrı Xav’yer Bettel belän Berlinda oyıştırğan berdäm mätbuğat cıyılışında Ğazzä xalqınıñ üz yazmışın bilgeli alaçaq kiläçäkkä häm tağın da kübräk gumanitar yärdäm belän saqlawğa ixtiyacı buluın äytte. “Ğazzä basıp alınırğa tiyeş tügel. Keşelär mäcbüri cirlärennän küçerelergä häm territoriyäläre keçeräytelergä tiyeş tügel,”-dide Germaniyä tışqı êşlär ministrı Annalena Berbok.

İsegezgä töşeräbez, İzrail matbuğatındağı xäbärlärdä Ğazzä sızığında yäşäwçe fälästinlelärne Ruanda häm Çadqa cibärü öçen söyläşülär baruı häm bu mäs’älädä töp kileşü yasaluı alğa sörelä.